IX – BA desentiéndese del procesu de creación de la TV autonómica

Noemí Martín y Rafel Palacios dieron esta mañana una rueda de prensa na que la so coalición declaró'l so disgustu col procesu de creación del Ente autonómicu de comunicación. IX-BA diz que se desentiende del procesu y da un plazu pa que se rectifiquen errores graves que se dan nel mesmu.

Nuna comparecencia que se fexo na Xunta Xeneral del Principáu, los representantes de la coalición d'izquierdes declararon que se desvinculen del procesu de creación de la RTVAS y que polo tanto nun se faen responsables del resultáu del mesmu. Noemí Martín y Rafael Palacios echáronse al pie de les declaraciones del Director del Ente José Ramón pérez Ornia na Xunta Xeneral el pasáu 14 de marzu pa condenar la manera en que ta llevando alantre la creación del entramáu mediáticu del Principáu y declarar que tienen retirada la confianza na so persona. Ornia dixere d'aquella que la TV había concebise como un serviciu públicu y de baxu coste pa les finances asturianes, cosa que según Martín y Palacios nun se ta respetando en cuantes que la TV va emitir el 8 de setiembre los actos del Día d'asturies contratando los servicios d'empreses particulares.

Posteriores declaraciones d'Ornia nes que'l director del Ente fizo de menos los puntos de vista d'IX-BA sobre la manera d'echar alantre la TV en cuantes qu'IX-BA yeren una minoría parlamentaria tamién pesaron na decisión de los grupos políticos de retirar la so confianza na persona del responsable del Ente, al entender qu'esto ye una cuestión de consensu y non un xuegu de mayoríes y minoríes. Sicasí, el puntu que yá nun tuvo torna posible pa ello foi l'apaición de la convocatoria pública d'emplegu pa entrar al Ente. Los responsables d'IX-BA declararon que tan recibiendo quexes de munchos profesionales de la comunicación que dicen nun entender un temariu estráu de xeneralizaciones y conceptos difusos. Noemí Martín punxo como casu prácticu'l d'ún de los puntos del temariu que s'entitula "¿quien es quien en la Junta General?" enunciáu que-yos abulta poco seriu y poco claru. Ello, y la priesa cola que quier facese tol procesu de selección de personal, ensin tiempu material a preparar los temarios, llevó a IX-BA a tomar esta decisión de desvinculase del procesu de creación d'una TV qu'amás fai de menos l'asturianu, como demuestren les bases de la convocatoria. Según Rafel Palacios, que calificó de ridícula la preba obligatoria y eliminatoria d'inglés pa los aspirantes cuando nun hai nenguna preba pa valorar el conocimientu d'asturianu "la televisión nun pue ser asturiana si desprecia l'asturianu".

Los representantes d'IX-BA piden agora qu'Ornia rectifique meyorando les bases de la convocatoria, aclariando los temarios de la oposición, dando más tiempu pa preparalos y enxertando nellos un mayor compromisu cola llingua. Ello, y l'esperar pal entamu de les emisiones a qu'estes puedan facese con medios propios y non subcontratando a terceres empreses, son les condiciones imprescindibles pa que IX-BA vuelvan a comprometese col Ente.