IV Seminariu ‘Oficialidá’: “El Gobiernu central tien qu’implicase nel usu de les llingües y na normalización”, diz Galán

“Foi mui interesante sentir toles propuestes d’otros territorios”, valoró Inaciu Galán sobre’l IV Seminariu ‘Oficialidá’ col nome ‘Entrín y non. Normalizar enantes de la oficialidá’. Coleutivos de dellos llugares del Estáu roblaron la ‘Declaración d’Uviéu’.

La tarde del vienres y a lo llargo de tol del sábadu desenvolvióse na Aula Magna del Edificiu Históricu de la Universidá d’Uviéu estes xornaes que nesta ocasión axuntaron a espertos asturianos y otros procedentes de Lleón, Val d'Aran, Aragón, Euskal Herria y Galicia. “Deprendióse muncho, foi ún de los seminarios nos que más coses práctiques saquemos”, espresa’l vocal d’Iniciativa pol Asturianu.

Asina los asistentes pudieron saber sobre’l casu aragonés, el lleonés…, “y ún un pocu distintu, el de Navarra, onde la oficialidá ye parcial por territorios, que sirvió pa conocer tamién les dificultaes de tener una oficialidá de baxa intensidá, que pue asemeyase un poco al estatus nuesu”. Tamién foi granible’l del Val d’Arán “porque comparten trés llingües oficiales y ye un exemplu a una esperiencia asemeyada a la que podemos tener nel ámbitu del Eo-Navia y que podía servinos un poco d’inspiración de modelu pa ver cómo se pueden facer les coses nel futuru estatus d’oficialidá n’Asturies no que respeuta al eonaviegu y al asturianu tanto nel territoriu del eonaviegu como nel restu d’Asturies, les opciones que s’abren y les diferentes maneres de facer esa oficialidá”.

Tamién cita “la conferencia de Nicolás Bartolomé sobre la reforma de la Llei d’Usu”, que considera “una referencia pa les persones que van tener que ponese na Xunta Xeneral a facer esa reforma”. “Consiguimos aportar a la sociedá un poco la reflexón al rodiu la cuestión llingüística, que nun hai munchos espacios pa ello”, añade Galán.

Trabayar l’ámbitu estatal y européu

El IV Seminariu ‘Oficialidá, el camín constitucional pal futuru del asturianu’ tuvo como pieslle una actuación musical de Mestura. Pero enantes celebróse una mesa redonda con A Mesa pola Normalización Lingüística (Galicia), Nogará (Aragón), Kontseilua (Euskal Herria), Faceira (Lleón) y Iniciativa pol Asturianu, organizaciones que roblaron la ‘Declaración d’Uviéu’.

Los presentes aportaron idees y propuestes pa trabayar dende l’ámbitu estatal, yá que “el Gobiernu central, anque se dieron pasos alantre nos últimos seis años, sigue siendo ayenu a la realidá llingüística del Estáu y tenemos que trabayar pa que la radiotelevisión pública española amuese esa realidá, pa que les instituciones tengan como propies eses llingües, non como un favor que faen por poner la páxina web, sinón que tamién tienen qu’implicase nel usu d’eses llingües y na normalización”, reclama Galán. “Ye un camín que tenemos que trabayar nestos años futuros en paralelu a solucionar el problema nuestru que tenemos equí de la falta d’oficialidá; nun hai que dexar de trabayar tanto nel ámbitu estatal como nel européu pa caminar hacia una meyor situación”, continuó.

Sobre la ‘Declaración d’Uviéu’ señala que “ye un manifiestu que quier ser una guía de futuru pa los próximos años precisamente nesti llabor, la implicación de les instituciones del Estáu central na normalización de les llingües d’España. La idea ye crear un frente ampliu ente tolos territorios con llingües propies diferentes al castellán pa que les llingües seyan un elementu más de les polítiques del Gobiernu, pa que nun quede too solo en manes de les comunidaes autonómes; que tamién faiga usu d’eses llingües de forma muncho habitual y xeneralizada, y que tenga nel horizonte oxetivos a cumplir”.

Nesi sen apunta que “nun pue ser qu’una televisión pública nun tenga nengún espaciu pa la difusión de les llingües del Estáu; que tapezan continuamente les intervenciones neses llingües cuando les faen políticos; que nun s’informe cuando ye’l Día de les Lletres n’Asturies… Son coses que nun pueden pasar. Tienen qu’amosase les realidaes llingüístiques y culturales del Estáu, la so diversidá, pa que nos conozamos ente nosotros y ente les distintes llingües”.

“Consensu sobre la necesidá de consensu”

La cuarta edición d’estes xornaes sirvió a Iniciativa pol Asturianu pa confirmar que “dificultaes tiénenles toles llingües minorizaes, non sólo del Estáu, d’Europa y del mundu; la tresmisión xeneracional complícase en tolos llugares y los problemes que tenemos nós, en mayor o menor midida, hailos en munchos sitios. Tenemos que conocer meyor eses realidaes y intentar aplicar los casos d’ésitu porque nun podemos mirar a nós mesmos y repetir estratexes continuamente. Y si nun funcionen, hai que cambiales”.

“Creo qu’hai un ciertu consensu sobre la necesidá de consensu, qu’enantes nin lo había, y eso ye importante”, sigue, porque “l’oxetivu nuestru ye convencer a toles fuerces polítiques. Nun se fixo mal estos años porque ganamos un porcentaxe de población mui ampliu pa esta batalla y eso significó que los partíos cambiaran la so postura. Nesi sentíu tamos dando pasos y ye inevitable qu’antes o depués, como paso primero con Izquierda Xunida y depués col PSOE, ocurra tamién col Partido Popular”.

“Lo que tenemos que facer dende la reivindicación llingüística ye evidentemente reclamar, pero tamién favorecelo y buscar les ferramientes pa facilitar esi consensu y ser útiles a la causa que nos mueve, que ye la sobrevivencia del asturianu, y eso pasa inevitablemente pola oficialidá, pero non solo pola oficialidá. Por eso’l títulu del seminariu d’esti añu yera eso de normalizar enantes de la oficialidá, entrín y non, esa espresión asturiana; nun ye que se renuncia a la oficialidá, pero mientres tanto, entrín y non, vamos siguir trabayando. Nun podemos tar paraos simplente col discursu d’esto va llegar porque sí, porque tenemos razón”, razona Galán, que considera que “el seminariu, y cualquier actividá que se faiga, tien que tener como oxetivu final sumar a más persones y más colectivos a la cuestión de la defensa del asturianu y de da-y futuru, porque sólo asina lo podemos llograr”.

Na semeya, Galán, acompañáu por Claudia Elena Menéndez Fernández y Iván Llera, vicepresidenta y presidente d'Iniciativa pol Asturianu, intervién nel IV Seminariu 'Oficialidá'.