La Sociedá Humanitarios de Samartín de Morea (Ayer) convoca'l Cuartu Concursu de Monólogos "Pepe Campo" en collaboración cola Conseyería de Cultura del Gobiernu d'Asturies. Les bases abren el certame a toles persones interesaes, col númberu de trabayos que-yos pete. El ganador/a de la cabera edición nun podrá presentase nésta. Premiaráse con 600 aquel monólogu, ensin asoleyar qu'a xuiciu del xuráu presente más valir lliterariu.
El premiu podrá repartise o quedar ermu y el monólogu tien que tratar d'un tema d'actualidá social, política y cultural. La obra podrá ser en versu o prosa; tendrá que tar en llingua asturiana y valoraráse la corrección llingüística y gramatical, asina como'l so carácter normalizador del idioma.
El llargor de los trabayos tendrá de ser d'un máximu de cuatro folios, en prosa o ente 150 y 200 versos El plazu d'entrega de los monólogos fina'l 21 d'ochobre del 2007 y tienen que se mandar a les señes de los Humanitarios de Samartín (apartáu correos 8, 33.670 - Morea Ayer-Asturies). Cada trabayu tien que dir nun sobre zarráu, ensin remite, col orixinal y tres copies, y amás, dientro'l sobre habrá otru sobre onde se conseñen los datos del concursante. El resultáu de la decisión del xuráu va notificáse-y al autor - o autores - del trabayu premiáu y les obres premiaes van pasar a ser propiedá d'Humanitarios.