IU y Podemos averen postures y abren un procesu d’alderique sobre’l programa pa les Europees

La iniciativa popular Podemos aconceyó con Izquierda Unida (IU) dientro de la ronda de contautos que ta calteniendo con formaciones polítiques. Na reunión averaron postures y decidieron abrir un alderique sobre’l programa pal 25-M.

Nun comunicáu conxuntu entituláu ‘IU y Podemos remarán juntos aunque no haya convergencia electoral’ y asoleyáu tres la celebración d'un conceyu nel que la coalición tuvo representada por Enrique Santiago y Miguel Reneses y la organización ciudadana por Pablo Iglesias, Miguel Urban y Carolina Bescansa, les dos formaciones amosaron diferencies de criterios de cara a una llista eleutoral conxunta pa les eleiciones al Parllamentu Européu del 25 de mayu, yá que la fórmula de primarias y participación abierta que defende Podemos nun ye compatible cola metodoloxía qu’aplica Izquierda Unida (IU), que busca alcuerdos con fuercies nacionalistes d’izquierda y protagonismu pa los sos militantes. Sicasí, dambes organizaciones decidieron abrir un procesu d’alderique sobre’l programa pa les Europees, al que quieren sumar a otres formaciones polítiques y movimientos sociales, enantes de decidir una posible llista.

D’igual forma, más allá de les eleiciones, IU y Podemos amosaron la so voluntá de construyir “un ampliu Bloque Social y Políticu” al que pretenden sumar a “los distintos sectores y movimientos sociales, amás d’a toles fuercies polítiques que trabayen na defensa de la democracia y contra les polítiques de recortes sociales y perda de soberanía de la Troika”. “Esi Bloque Político y Social deberemos construyilu xuntos y ensin condiciones previes”, añaden nel comunicáu.

Anova va dir con IU

La militancia de la formación gallega Anova-Irmandade Nacionalista, escisión del BNG, decidió acudir a les eleiciones al Parllamentu Europeo con IU. Esta organización yá foi en coalición con Esquerda Unida nes nacionales del 2012 baxo’l nome d’Alternativa Galega de Esquerda, na que tamién participó Equo y Espazo Ecosocialista Galego, algamando 9 diputaos. El ganador d’estes eleiciones foi’l PP con 41 escaños, por 18 del PSOE y 7 del BNG, partíu qu’amosó la so disposición por dir a les Europees na coalición que lidera EH Bildu y na que va participar Andecha Astur.