IU-Verdes critica que'l costu de la incineradora yera sin IVA

IU-Verdes criticó que'l costu anunciáu de la incineradora yera sin IVA, polo que "va costar 298,8 millones d'euros en cuenta de los 250 millones" pactaos por PSOE y PP.

IU-Verdes aseguró qu'asina lo demuestra la convocatoria del Conseyu d'Alministración de Coxersa pal próximu vienres, "na que la empresa certifica que'l pactu algamáu por PSOE y PP tapeció la cifra del acuerdu".
  
D'esta manera, aplicando l'IVA "la incineradora yá cuesta 295 millones d'euros, a los qu'hai qu'añadir otros más de cuatro millones d'asistencia técnica más el so correspondiente IVA, que supón unos 478.000 euros".
  
Amás, IU-Verdes recordó qu'a esa cantidá de 298,8 millones d'euros, habría que sumar los intereses "que tovía nun figuren nos documentos escritos" y que contabilicen "12 millones d'euros". Esti documentu conocíu güei, confirma, según IU-Verdes, los sos "mieos", que yá alvirtieren "de la falta d'esti importante datu al aprobar los planes de Coxersa".
   
Amás, IU-Verdes apuntó que representantes de la coalición política demandaron esta información na Xunta de Coxersa la selmana pasada, que "nun respondió".
  
IU-Los Verdes dixo que nun cree la cifra política qu'establecieron pente medies d'acuerdu PSOE y PP, dao que nun se correspuende colos "precios de mercáu", y afirmó que'l so costu real "va ser mui superior a la vista de lo que cuesten otres instalaciones d'esti tipu".
  
Recordó amás que la incineradora de Zubieta, pa 261.000 tonelaes al añu, taba proyectada nel 2008 por 186 millones d'euros, y tovía sin acabar de construyir, yá supón 400 millones d'euros. Coles mesmes, n'Asturies, criticó que se disgreguen de la planta incineradora dos instalaciones imprescindibles (pa escories y enfardáu) "que se van a licitar per otra parte, lo que nun supón nengún aforru real".
  
A lo último, IU-Verdes afirmó que'l próximu vienres Coxersa pretende "llograr el vistu bonu p'axudicar el proyectu y la construcción de la incineradora sin reparar en qu'esi proyectu tien que sometese obligatoriamente a Evaluación y Declaración d'Impactu Ambiental, un procedimientu que va establecer condiciones pa la construcción del macrofornu". Poro, la coalición política indicó que va tener que modificase dempués de la contratación, "una cuestión absurda y de dudosa llegalidá, que probablemente va valir d'escusa pa elevar el preciu y adaptala al costu real".