Itensifícase en Francia la protesta contra la reforma de pensiones

Les protestes pola reforma del sistema de pensiones promovida pol Gobiernu de Nicolas Sarkozy intensificáronse esti llunes en Francia. Los camioneros y el sector ferroviariu dieron les respuestes más contundentes.

El Gobiernu, que, pese a los actos de protesta, qu'empezaron hai dellos meses, sigue defendiendo la necesidá d'elevar la edá de xubilación, aseguró que'l funcionamientu de les infraestructures públiques nun se va parar.
  
La güelga nes refineríes, entamada hai una selmana, baxó'l suministru en cientos d'estaciones de serviciu de tol país. Pa la petrolera Exxon Mobil, "la situación ye crítica". "Cualquier que vaya a buscar diésel nes rexones de París y Nantes va tener problemes", dixo una vocera de la compañía.
  
Les midíes de presión intensificáronse de cara a la manifestación nacional convocada pa esti martes, un día antes de la votación nel Senáu sobre la impopular reforma del sistema de pensiones.
  
Los trabayadores de les 12 refineríes qu'hai en Francia tán nel so séptimu día de güelga y los manifestantes tán torgando l'accesu a numberosos depósitos de distribución de combustible. La Unión Francesa d'Industries Petroleres (UFIP) alvirtió qu'a mediaos d'esta selmana podríen surdir graves problemes de suministru, lo que significa que'l Gobiernu podría tener que plantegase'l recurrir a les reserves d'emerxencia.

Aeropuertos
La Confederación Xeneral del Trabayu (CGT) animó esti llunes a los trabayadores a protestar esti miércoles nos aeropuertos de tol país. Esti sindicatu, el más grande dientro de l'aerollinia Air France, señaló que esto nun tien por qué llevar al bloquéu del accesu a los aeropuertos anque podría asoceder.
  
Mientres, el Gobiernu trata de convencer a la población de que'l país dispón d'una gran cantidá de combustible y de que los aeropuertos tienen suministros a esgaya. El ministru d'Industria, Christian Estrosi, declaró a la emisora de radio RTL que "el Gobiernu tien el control". "Les empreses nun van sufrir bloqueos, el tresporte nun va sufrir bloqueos y los automovilistes nun van sufrir bloqueos", sorrayó.
  
El 60 por cientu de les ventes de carburante en Francia concéntrenlu les cadenes de supermercaos y hipermercaos. Una asociación que representa a gran parte d'esti sector afirmó esti llunes qu'ente 500 y 1.000 gasolineres tán vacíes, quedaron sin nengún tipu de combustible o tán intentando consiguir más carburante.
  
Mientres, los camioneros tán ralentizando'l tráficu nes carreteres de París y nes d'otres ciudaes como Lille, Lyon y Rennes dende esti domingu pente medies de furgonetes, anque tovía nun optaron por utilizar camiones de gran tamañu pa cortar les víes.

Alvertencia del gobiernu
El primer ministru, Francois Fillon, dexó claro qu'evitar el normal funcionamientu d'infraestructures vitales ye illegal. "El derechu a la güelga nun ye'l derechu a prohibir l'accesu a un depósitu de combustible. Eso ye una acción illegal", dixo Fillon el domingu a la cadena de televisión TF1. "Nun voi permitir que la economía francesa afuéguese pola mor del bloquéu del suministru de combustible", aseguró.
  
En delles cadenes de televisión apaecieron dellos trabayadores de la refinería de Grandpuits afirmando que-yos comunicaron que, por orde del Gobiernu, tienen que dir a trabayar porque en casu contrariu podríen ser deteníos. Sicasí, añadieron que nun puen obedecer porque dellos compañeros suyos formaron cadenes humanes pa torgalo.
  
La mayoría de los franceses apoyen les protestes y manifestaciones contra la llei cola que'l Gobiernu quier elevar dos años la edá mínima pa xubilase y la edá pa xubilase totalmente, hasta los 62 y los 67, respectivamente. L'Executivu afirma qu'ésta ye la única manera de contener el déficit nel sistema de pensiones.
  
Los puntos principales del proyectu de llei de Sarkozy yá s'aprobaron nel Senáu y na Asamblea Nacional, y tres la votación programada pa esti vienres sobre'l testu completu, ésti podría tornar en llei nun cortu periodu de tiempu.