Ismael González Arias va falar en Villaviciosa del cancioneru venceyáu a la mazana y la sidra

La Fundación José Cardín Fernández, dientro de les actividaes del so Branu Cultural, entama esti xueves una conferencia sobre ‘El cancionero de la sidra’. Ismael González Arias ye l’encargáu de dar esta charra en Villaviciosa.
 
La conferencia va tratar, en concreto, “sobre’l cancioneru rellacionáu cola sidra y la mazana, partiendo de les pieces qu’apaecen nos cancioneros del sieglo XIX, pasando poles grabaciones en cilíndros de cera, discos de pizarra y vinilu del sieglo XX, hasta llegar a los nuesos díes. Va ser un perecorríu p’alvertir de la importancia de dambos productos dientro de la cultura asturiana”, anuncia la Fundación. L’aula d’esta entidá maliaya va acoyer mañana, a les 20 hores, la charra que protagoniza González Arias, direutor del programa ‘Sones’, de la TPA, y de ‘Música músiques’, de la RPA.
 
González Arias ye tamién escritor y productor musical de renome nel mundu de la tonada, llegando a trabayar pa Rosario González, Liliana Castañón, Anabel Santiago o los Hermanos Valle Roso. Amás, tamién produxo espectáculos musicales como Torner, Nel Camín o Cantares de la Francesada. No que respeuta a la so creación lliteraria venceyada a la música, destaquen los sos trabayos ‘L’Asturianada’, ‘Les Cuarenta Principales’, ‘Cantares de Llanes’, ‘Cronoloxía de la música asturiana’, ‘Historia de la Música Asturiana’, ‘L’Asturianada: alma d’un pueblu’ y ‘100 años de música asturiana’.