Irlanda defende'l patrimoniu

Hai pueblos que miren más pol patrimoniu qu'otros. Asturies nun ye precisamente de los que más faen por defender los restos qu'identifiquen el so pasáu, y tol añu vemos noticies de que se llanten antenes de telefonía móvil n'antiguos castros o de que tal o cual yacimientu alborez esfarrapláu pol primer gamberru que pasa. Casos como'l del castru de Cellagú, que va destruise pa consentir l'enanchamientu de la cantera de la fábrica d'hormigón que llinda con elli col preste de la comisión de patrimoniu son yá por demás.

Mientres, n'Irlanda la construcción d'una carretera amenaza de muerte lo que queda del Carrickmines Castle, un castiellu normandu al sur de Dublín que xugó un importante papel na historia del llugar al correr de dellos sieglos con puntu final cuando la tropa inglesa derrotó a los rebeldes irlandeses que lu defendíen nel añu 1642. Énte l'entamu de la obra de la carretera, qu'estrozaría un castiellu, arriendes d'interesante, a medio escarbar y investigar, colectivos y xente preocupao montaron una plataforma que tien hasta web propiu. Dende'l 31 d'agostu, la plataforma caltién una toma del castiellu que nun piensen dexar hasta que l'autoridá nacional de carreteres decida apartar la carretera unos metros más p'allá. Amás de la protesta nel llugar, l'asociación de conservación del mediu ambiente An
Taisce ta preparando una pleitu por esti asuntu, ya que de mano nun taba pensao que la carretera pasare precisamente pel castiellu. Un periodista del Irish Times descubrió amás que la destrucción del patrimoniu nun yera gratuita sinon qu'había intereses creaos…