Irene Montero (Podemos) xúntase a la petición d'oficialidá

Na rueda de prensa celebrada esta mañana tres de la Xunta de Portavoces, Irene Montero, la vocera del grupu parllamentariu d'Unidos Podemos nel Congresu de los Diputaos, xuntóse a la petición d'oficialidá pal asturianu.

Igual que'l restu de miembros del grupu parllamentariu, que fixeron una semeya de conxuntu con motivu del Día de les Lletres Asturianes que se celebra mañana, Montero vistió una camiseta d'Iniciativa pol asturianu col lema "Oficialidá, ye futuru pal asturianu".