Iniciativa reclama l'aprobación na Xunta Xeneral del mandatu marcu de RTPA

Coincidiendo col Día Mundial de la Televisión la organización tornó a reivindicar esti instrumentu qu'afite los porcentaxes d'emisión d'asturianu.

Ayeri, 21 de payares, ye la fecha que Naciones Xuníes estableció nel 1996 pa esta conmemoración que toma como referencia la primer xornada del I Foru Mundial de la Televisión. La intención de la organización con ella yera promover intercambios de programes centraos na paz, la seguranza, el desendolcu económicu y social y la cultura, ente otres cuestiones, pola importancia d'esti mediu na orientación, canalización y movilización de la opinión pública.

Iniciativa pol Asturianu aprovechó'l día p'asoleyar de tarde un comunicáu nel que demanda a la Xunta Xeneral "l’aprobación del mandatu marcu pa la Radio Televisión del Principáu d’Asturies (RTPA) como un pegoyu fundamental pa llograr una presencia digna del idioma nel ente públicu". Dende esta entidá considérse "mui probe’l porcentaxe de programación n’asturianu, inesistente nel casu del eonaviego", y ve nel ente públicu "una ferramienta fundamental pa dar visibilidá al idioma pol so papel normalizador".  

"Los medios de comunicación tienen un papel central a la hora de revertir l’actual procesu de minorización del asturianu y l’eonaviego, oxetivu qu’agora comparten la mayor parte de les fuercies polítiques con representación nel Parllamentu asturianu", polo qu'esixe a Francisco González Orejas, direutor xeneral en funciones, "qu’apueste definitivamente poles llingües propies y que trabaye pa que los medios de comunicación públicos se conviertan d’una vegada por toes nun axente principal de normalización con una presencia d’estes digna, tresversal y continuada".

Contautu con Gutiérrez

La organización de reivindicación llingüística treslladó ésta y otres demandes a Ana Vanessa Gutiérrez, viceconseyera de Cultura, Política Llingüística y Deporte, nun conceyu'l mes pasáu. "Amás del desendolcu d’un mandatu marcu ambiciosu que recueya un incrementu progresivu de la programación nes llingües propies, Iniciativa pol Asturianu propunxo convertir la RPA nuna emisora 100% n’asturianu y eonaviego y la ellaboración d’un manual d’estilu qu’estableza l’usu de la toponimia tradicional de forma prioritaria tanto na espresión oral como per escrito en tolos programes y soportes de RTPA", espliquen.

Por último, fai un llamáu a les fuercies polítiques "pa trabayar nun consensu que dea una presencia digna a les llingües nos medios públicos de comunicación y procure una presencia tresversal y continua na programación de tolos canales de RTPA", pidimientos que tamién tresllada al Centru Territorial d'Asturies de RTVE.