Iniciativa reclama a los 24 diputaos a favor de la oficialidá “un desendolque máximu de la Llei d’Usu”

Los cuatro partíos favoratibles a la reconocencia de los derechos de los falantes d’asturianu y gallego-asturiano tornen a ser mayoría nesta llexislatura. PSOE, Convocatoria por Asturies, Podemos y Foro sumen 24 diputaos, insuficientes pa reformar l’Estatutu, pero a los qu’Iniciativa pol Asturianu reclama “un desendolque máximu de la Llei d’Usu” y siguir buscando un consensu pola oficialidá.

“Agora, más que nunca, ye necesario buscar alcuerdos p’avanzar y trabayar nun Plan de Normalización Llingüística que se ponga en marcha dende’l primer día de gobiernu. Nun pue volver a perdese’l tiempu na dignificación del asturianu y l’eonaviegu, nin nel Gobiernu autonómicu nin nos conceyos, en nengún ámbitu, pero muncho menos naquellos que van tar gobernaos por partíos que lleven la oficialidá nel programa”, apunta la organización, qu’esixe “un avance de máximos pal desendolque de la Llei d’Usu y Promoción del asturianu, vixente dende l’añu 1998”.

D’igual forma, considera imporante siguir trabayando p’algamar un gran consensu pola oficialidá, “sumando voluntaes, llogrando abrir nuevos espacios pal idioma y consiguiendo concienciar a los partíos políticos qu’entá nun se sumaron al consensu constitucional del valor de los nuesos idiomes y de la so supervivencia. Asturies nun pue siguir siendo una anomalía en derechos llingüísticos y protección del patrimoniu inmaterial que son les nueses llingües”.

Na imaxe, edificiu de la Xunta Xeneral. Semeya propiedá de la Xunta Xeneral obra de Kike Llamas.