Iniciativa propón reconocer la capacitación n’asturianu na habilitación de guíes turísticos

|
Guía turísticu Iniciativa pol Asturianu

Llograr la preparación de los y les guíes na llingua propia y, d’esta manera, algamar una certificación del conocimientu de la llingua asturiana pa poder ufiertalo turísticamente. Ye la demanda d’Iniciativa pol Asturianu a la Conseyería de Cultura, Política Llingüística y Turismu, coleutivu que recuerda’l valor añadíu qu’aporta l’idioma al productu.

“Dende va tiempu hai iniciatives empresariales orientaes nel sector de la cultura y turismu qu’apuesten pola llingua asturiana pa dar a conocer espacios d’Asturies que son un verdaderu ésitu”, argumenta la organización, pa la que “apostar pola llingua propia xenera un valor añadíu a esa ufierta turística y permite tamién la promoción y normalización social del idioma”. Nesi sen considera que, “gracies a la cenciella intelixibilidá del asturianu col castellán ye posible facer cualesquier visita guiada n’asturianu con visitantes de diferentes puntos d’España”.

Pa Iniciativa pol Asturianu l’habilitación en llingua asturiana de guíes turísticos “permitiría equiparar el idioma al restu de llingües como l’inglés o l’alemán”. Tamién “impulsar el conocimientu y la formación en llingua asturiana” y “da-y más valor y prestixu al idioma”.

Contador Estadistiques