Iniciativa presenta en Gipuzkoa'l so programa de radiu y 'Alderiques d'Asturies'

Inaciu Galán, presidente d'Iniciativa pol Asturianu, participa esti vienres nel alcuentru européu Hitzargiak que se desendolca n'Hernani. Va encargase de presentar los proyeutos 'Iniciativa pol Asturianu nes ondes' y 'Alderiques d'Asturies', catalogaos como "bones práutiques llingüístiques" pola organización.

Dende ayeri y hasta güei, baxo'l lema 'Llingües que s'allumen unes a otres' dientro de les actividaes por mor de la Capitalidá Europea de la Cultura 2016 de Donostia, representantes de delles entidaes van compartir actividaes entamaes en defensa y promoción de llingües europees amenazaes, activándose asina rellaciones, collaboraciones y sinerxes ente los participantes per aciu numberoses presentaciones y actividaes. Galán va participar en concreto na mesa redonda 'Medios de comunicación, ayudantes na construcción de sociedaes multillingües', prevista pa les 15 hores.

Nella presentará la situación del asturianu y los proyectos nos que ta implicada Iniciativa pol Asturianu: el so programa de radio Iniciativa pol Asturianu nes ondes, dirixíu por Samuel Gradín, y el proyectu 'Alderiques d’Asturies', que se realiza en collaboración con Gomeru Producciones, s'emite en MuyMuy Televisión y ye'l primer programa de televisión100 por cien n’asturianu.

N'Hitzargiak van mostrase más de 70 bones práutiques, d'un total de 12 estaos y 24 llingües. Iniciativa pol Asturianu califica esti alcuentru “como una oportunidá inmeyorable p'aprender d'otres comunidaes llingüístiques, asina como pa compartir lo bono que dende la sociedá civil podamos tar faciendo n’Asturies nesti ámbitu”.