Iniciativa pol Asturianu y una familia uviedina trabayen pa que'l so fíu tenga clase de Llingua Asturiana

Illán ye un neñu del Colegio Marista Auseva que, como otros munchos en tol país, nun tien maestru de Llingua Asturiana. Iniciativa pol Asturianu y los padres del uviedín nun descarten llevar esta situación a los tribunales.

Ésti ye’l primer cursu  nel qu’Illán, escolín de sestu de Primaria, nun pue recibir clase de Llingua Asturiana énte l’ausencia d’un maestru d’esta asignatura nel so colexu, una situación que tamién se da n’otros trece centros del país, según denunció’l 20 de setiembre’l Sindicatu Unitariu y Autónomu de Trabayadores de la Enseñanza d’Asturies (SUATEA). La propia escuela reclamó a la Conseyería d’Educación, Cultura y Deporte que-y unviaran un profesor d'asturianu, pero’l neñu sigue ensin recibir clases de la so propia llingua.

Iniciativa pol Asturianu “ta dispuesta a apoyar a esta familia hasta les últimes consecuencias y ta asesorándolos pa llegar a los tribunales si ye necesario, yá qu’a xuiciu de la organización, el drechu a estudiar asturianu ye irrenunciable y ha respetase dende les instituciones. Lo contrario ye una marxinación de ciudadanos por mor de la so llingua, lo que contradiz al espíritu de la Llei d'Usu del Asturianu de 1998, asina como la llexislación internacional en Drechos Humanos y la Carta Europea de les Llingües Minoritaries, ratificada por España”, señala esti coleutivu nun comunicáu, nel que tamién animen a otres families n'igual situación a sumase a la demanda. Tanto Iniciativa como la Xunta pola Defensa de la Llingua Asturiana (XDLA) reclamaron recién soluciones a la conseyería pa salvar esta situación que dexa a cientos d’escolinos y escolines ensin clase de Llingua Asturiana y Gallego-asturiano.