Iniciativa pol Asturianu y el CUPA entamen dos cursos d’asturianu nos meses de mayu y xunu en Xixón

Ún de nivel básicu y otru avanzáu. Iniciativa pol Asturianu y el Conceyu Universitariu pol Asturianu entamen dos cursos d’asturianu que van desendolcase na sede del Conseyu de la Mocedá de Xixón. La matrícula va tar abierta hasta’l 11 de mayu.

 

La organización anima a participar nestos cursos “que van sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies”. La xente ensin conocimientos d’asturianu o con fundamentos mui básicos va poder participar nel nomáu ‘nivel inicial’, que va recibir clases los martes y xueves, de 19 a 21 hores. Mentes, les persones que yá fixeran dalgún cursu o tengan una conocencia más fonda del idioma tienen la posibilidá de d’apuntase al ‘nivel II’, con docencia los mesmos díes, pero n’horariu de 17 a 19. Otra manera, si nun ye posible’l desplazamientu a Xixón, esiste la opción de siguir les clases a distancia. Éstes van dar aniciu’l 12 de mayu y cunten con 36 hores llectives, polo que van finar el 25 de xunu.

 

El preciu pa matriculase a cualquier de les dos opciones ye de 60 euros, cantidá qu’inclúi tolos materiales. Los socios d’Iniciativa pol Asturianu tienen un descuentu de 10 euros, polo que les persones qu’aprovechen la inscripción nel cursu pa formar parte d’esta asociación que trabaya pa la normalización del idioma en toles estayes tamién van poder disfrutar de la promoción pola que tolos socios nuevos reciben un llote de revistes de Formientu valoráu en 45 euros –válidu tamién pa la xente que traiga xente nuevo al coleutivu–, destinándose otru igual a la biblioteca del centru escolar que se desee. El plazu pa inscribise fina’l 11 de mayu y el mou pa formalizar la matrícula ye al traviés del corréu electrónicu conceyuasturianu@gmail.com y del teléfonu 615.982.816 (tamién per Telegram o WhatsApp). Hai que destacar qu’estos cursos cunten cola collaboración de l’Academia de la Llingua Asturiana y el Conseyu de la Mocedá de Xixón.