Iniciativa pol Asturianu va presentar la campaña ‘La empresa asturiana muévese!’ el 14 de xunu

|

La campaña d’Iniciativa pol Asturianu pa buscar la implicación de les empreses nel usu del asturianu yá ta en marcha. Ésta, que lleva’l nome ‘La empresa asturiana muévese!’, va presentase na sede central de FADE’l 14 de xunu.

El proyeutu, ún de los principales del Plan d’Actividaes 2013 que’l coleutivu cívicu aprobó na Xunta Xeneral celebrada en febreru, busca “dotar a la llingua asturiana d'un estatus, amás d'un usu útil y activu na sociedá asturiana, capaz de xenerar un beneficiu  económicu y social al traviés de la firma de convenios con empreses y negocios que busquen introducir l'asturianu con unos criterios básicos d'usu”. D’esta forma, Iniciativa pol Asturianu pretende treslladar a les empreses del país los beneficios que traería pa los sos negocios l’emplegu del asturianu.

L’asociación que trabaya pola normalización del idioma aspira tamién a axuntar baxo la marca ‘La empresa asturiana muévese!’ a toles firmes “comprometíes cola sociedá y, poro, col asturianu”, pa lo que tratará d’asesorar a les empreses del país al traviés d’un ‘Códigu de bones práutiques llingüístiques’. Tolos detalles d’esta campaña tan ambiciosa van dase a conocer el vienres 14 de xunu, a partir de les 12.30 hores, na sala polivalente de la sede central de la Federación Asturiana de Empresarios (FADE), asitiada na cai Pintor Luis Fernández, númberu 2, d’Uviéu. Nesti actu, abiertu al públicu, van participar empresarios que yá vienen utilizando l’asturianu de forma natural na so actividá.

Actos en Cangues el vienres

Iniciativa pol Asturianu va entamar delles actividaes mañana en Cangues. La primer d’elles trátase d’una charra-alderique pa escolinos y escolines de tercero de la ESO de IES ‘Rey Pelayo’, a pidimientu del profesor Fonsu Martín, a les 12.55 hores. Nella, va esplicase a los alumnos de Llingua Asturiana la situación del idioma y éstos van dar la so visión propia sobre esti asuntu.

Yá de tarde, el Bar Filandón (cai Constantino González, 4) va acoyer un actu col que’l coleutivu cívicu pretende dase a conocer nel conceyu de Cangues d’Onís. Un recital de poesía abrirá l’actu a les 20 hores, pa depués continuar cola presentación del númberu 11 de la revista lliteraria d’autores mozos, Formientu, y finar con una charra a cargu d’Inaciu Galán, presidente d’Iniciativa pol Asturianu, entitulada ‘Actualidá y futuru de la llingua asturiana’.

 

Contador Estadistiques