Iniciativa pol Asturianu va aconceyar en Madrid con diputaos asturianos

Inaciu Galán, presidente d’Iniciativa pol Asturianu, desplazóse a Madrid pa llevar la situación del idioma al Congresu. Esti llunes entregó dos cartes nos ministerios de Fomentu y Educación, y el martes va entrevistase con diputaos asturianos.

La intención del testu ellaboráu pol coleutivu que trabaya pola normalización del idioma p’Ana Pastor, ministra de Fomentu, ye la de reclama-y el cumplimientu de la “toponimia oficial nel territoriu asturianu”. Na carta tamién anima a Pastor “a usar l’asturianu con normalidá nes infraestructures, instalaciones estatales de tresportes, dependientes del mesmu y presentes n’Asturies: carreteres, ferrocarriles, aeropuertos, puertos, etc”. Pela so parte, la destinada a José Ignacio Wert, ministru d’Educación, Cultura y Deporte, pretende treslladar al popular “la situación na quedaría la llingua asturiana d’aprobase la nueva reforma educativa, solicitando una solución que permita que l’asignatura tea, polo menos, nes mesmes condiciones nes que ta agora, que yá son bastantes males –como yá espresó la vocalía d’Enseñu de la organización en numberoses ocasiones–, asina como la reconocencia de la especialidá d'asturianu pal profesoráu”. En dambos casos solicítase tamién a los ministerios qu'usen l'asturianu na so páxina web, como faen col restu de llingües del estáu y inclusive col inglés, que nun ye idioma oficial nel Estáu.

Galán completa’l so desplazamientu a Madrid con dellos conceyos previstos pa mañana nel Congresu con diputaos asturianos na capital castellana. De momento tán confirmaos alcuentros con Carmen Maniega (PP), Antonio Trevín (PSOE) y Enrique Álvarez Sostres (Foro de Ciudadanos), anque ye posible que, a última hora, se celebre dalgún más. L’oxetivu d’estes cites ye tratar colos representantes asturianos nel Congresu “cuestiones como la situación del asturianu cola nueva reforma educativa, l’usu de la toponimia oficial asturiana nes carreteres estatales y otres qu’afecten a la llingua asturiana nel ámbitu estatal”. Amás, Iniciativa pol Asturianu va proponer soluciones a estos temes y ufrir llinies de trabayu de cara a facer una defensa continuada del idioma en Madrid.