Iniciativa pol Asturianu sofita'l manifiestu del mundu de la cultura

"Coincidimos en qu'agora más que nunca ye'l momentu de que la RTPA dea pesu a la llingua asturiana", tresllada la organización.

Al pocu de facese públicu'l manifiestu ‘Por una RTPA al serviciu de la cultura asturiana’, firmáu por 118 personalidaes de la cultura asturiana pa reclamar una una “presencia digna, global y permanente de la cultura asturiana” nel ente públicu de comunicación, Iniciativa pol Asturianu amosó'l so sofitu a esti pasu conxuntu dáu polos creadores. "Llevamos años reclamando estes mesmes llinies de trabayu na RTPA y yá fiximos llegar a les fuercies polítiques y a la propia direición del ente la necesidá d'afitar esti llabor al traviés de les bases que tienen de rexir el funcionamientu de la RTPA, qu'han marcase al traviés del Mandatu marcu, pendiente d'aprobar na Xunta Xeneral d'Asturies".

Esti coleutivu recuerda que nel 2016 presentó'l documentu 'Una RTPA pa la próxima década. Informe d’Iniciativa pol Asturianu con un analís de los diez años caberos y propuestes llingüístiques y culturales pal Mandatu Marcu', "que sigue vixente, yá que la mayor parte de los pasos plantegaos siguen ensin cumplise". "Coincidimos en qu'agora más que nunca ye'l momentu de que la RTPA dea estos pasos y agradecemos a toles personalidaes firmantes d'esti manifestu'l so sofitu a unes midíes más que necesaries pal desenvolvimientu d'una radiotelevisión al serviciu d'Asturies y la so cultura, como demanda la sociedá asturiana", espresa nun comunicáu.

Na semeya, Iván Llera, presidente d'Iniciativa pol Asturianu, atendiendo a la TPA.