Iniciativa pol Asturianu recuerda a Iglesias Caunedo l’usu del topónimu ‘Uviéu’ por parte del PP llocal

|
Plaza la Catedral d'Uviéu

Unes declaraciones d’Agustín Iglesias Caunedo, que llamó al actual primer edil d’Uviéu, Wenceslao López Martínez, “Puigdemont asturianu” por defender el topónimu ‘Uviéu’, tán llevantando polémica estos díes. Iniciativa pol Asturianu recuerda al ex alcalde que’l Partido Popular (PP) yá venía utilizando esti nome de llugar.

Iglesias Caunedo considera ‘Uviéu’ como una invención y refuga la denominación bilingüe ‘Oviedo/Uviéu’ que ye la qu’incorporará l’espediente toponímicu que s’aprobará nos meses próximos. Les pallabres del agora voceru municipal del PP, que llegó a calificar a López Martínez como ‘Puigdemont asturianu’ por defender l’usu d’Uviéu, atoparon el so altavoz nun diariu asturianu, provocando delles reaiciones y un alderique en redes sociales.

Asina, el tripartitu posiciónose a favor del emplegu del nome de llugar ‘Uviéu’, mentes que Foro afirmó que “la toponimia d’Uviéu tien que servir p’arriquecer y xunir, non pa emprobecer y enfrentar a los uviedinos”, en pallabres de la so vocera Camino Gutiérrez, que considera qu’hai coses prioritaries a la recuperación toponímica: “Paeznos munchísimo más importante dedicar los esfuercios de los gobernantes a evitar l’éxodu de la mocedá por falta d’inversiones pa que s’asienten n’Oviedo”.

Iniciativa pol Asturianu, pela so parte, recordó a Iglesias Caunedo que’l PP, baxo l’alcaldía de Gabino de Lorenzo, yá venía utilizando’l topónimu Uviéu pese a nun ser oficial, “como nel certamen de folclore Ciudá d’Uviéu o'l premiu fundáu pola mesma formación de narrativa, poesía y teatru nomáu ‘Uviéu’ d’alcuerdu cola Academia de la Llingua Asturiana”, amás de que l’agora delegáu del Gobiernu estatal n’Asturies fora’l que punxera en marcha'l procesu pa oficializar la toponimia del conceyu.

“Les declaraciones d'Agustín Iglesias Caunedo faciendo comparanza con situaciones polítiques d'otros territorios son una vergoña, una manipulación mui fea d'esti procesu y una verdadera contradicción cola postura del so partíu, qu'aprobó col so votu la oficialización de la toponimia tradicional en decenes de conceyos d'Asturies, por nun falar de Galicia”, critica esta organización, que demanda al Conceyu d’Uviéu “una campaña d'información y sensibilización alredor de la oficialización de la toponimia tradicional”.

Contador Estadistiques