Iniciativa pol Asturianu reclama a ‘Sidra de Asturias’ l’usu del idioma na so campaña ‘Asturiano 100%’

El Conseyu Regulador de la DOP ‘Sidra de Asturias’ tien en marcha una campaña promocional de nome ‘Asturiano 100%’ nel que la llingua asturiana nun ta presente. Iniciativa pol Asturianu solicita la inclusión del idioma na mesma, “como yá fixera n’otres vegaes”.

“De la mesma miente que les entidaes de denominación d’otros sitios rentabilicen como valor añadíu’l so orixe, la de la sidra asturiano failo amosando que s’usa productos y fabricación asturianos pero nun usa la llingua que ye propia del llugar onde se fai. Lo cual ye llamativo, nuna campaña nomada “Asturiano 100%”, apunten dende’l coleutivu. “La organización sabe de la importancia y los bonos resultaos del usu del asturianu na publicidá y más nesti tipu de productos”, añade.

Nesi sen, Iniciativa pol Asturianu recuerda les pallabres de Lluis Nel Estrada na so comparecencia informativa na Comisión Especial d’Estudiu sobre'l Réxime de Proteición y Promoción del Asturianu: “Ye la nuestra llingua asturiana tan importante cuando mos referimos al sector agroallimentariu y a la gastronomía asturiana que nun podrían pescanciase estos caberos ensin la primera. Porque los nuestros productos de calidá y la nuestra gastronomía denómense, falen y esprésense n`asturianu”.