Iniciativa pol Asturianu reclama a Política Llingüística que cumpla cola normalización del idioma

La paralización de l’actividá de cuatro servicios de normalización lleva a Iniciativa pol Asturianu a reclamar a Política Llingüística que cumpla cola normalización del idioma. Entiende que'l so deber ye mirar por qu’éstos se caltengan.
 
Los trabayadores d’estos servicios anunciaron recién el pieslle, por falta de financiación, de les oficines de Llaviana, Corvera y la Mancomunidá d’Ozcos-Eo, a los qu’hai que sumar la de Mieres, ensin actividá dende agostu. “Como nun podía ser d’otra manera, dende Iniciativa pol Asturianu oponémonos al retrocesu que supón dexar ensin normalización a los conceyos nos que trabayen estos servicios y la consiguiente perda de puestos de trabayu que remanez d’ello”, señalen nun comunicáu.
 
Esta organización de creación nueva entiende que la Direición Xeneral de Política Llingüística “tien la obligación y la responsabilidá de cumplir cola normalización llingüística, calteniendo estos servicios, afalando a los conceyos a la estabilidá de los mesmos y faciendo que la Rede llegue al 100 por cientu de la población asturiana, ampliándola a los llugares a los qu’agora nun llega”. D’igual forma apoyen la reclamación de l’Asociación de Trabayadores de la Normalización Llingüística de dar “personalidá xurídica propia a la Rede de Normalización Llingüística nos Conceyos, dalgo que facilitaría la coordinación y qu’anguaño esiste únicamente pola voluntá de los téunicos”.
 
Iniciativa pol Asturianu recuerda qu’estos servicios son los departamentos que “desendolquen el trabayu téunicu de cara a avanzar nun consensuáu procesu de normalización del idioma asturianu y del eonaviegu”, un llabor “necesariu, xustu ya ilusionante de fomentu” de les dos llingües “nun nivel de contautu más direutu cola ciudadanía”.
 
Apoyu al proyeutu por parte de Dark la eMe
 
Esta selmana espublizóse na rede’l mensaxe de sofitu de Dark la eMe a Iniciativa pol Asturianu que se proyeutó nel actu inaugural del coleutivu celebráu’l 17 d’avientu. Nel videu pue vese a Mario Fueyo, nome real del músicu, falar de la importancia que tien que “l’asturianu entre nes escueles pa deprender les normes y la gramática”, asina como falar la llingua en casa. Tamién señala la so intención de dar más puxu al asturianu nes sos composiciones y lo necesario que ye la esistencia d’artistes y bandes d’estilos musicales modernos nel nuesu idioma pa qu’ésti llegue a la xente mozo.