Iniciativa pol Asturianu propón aprobar un Plan de Normalización Llingüística esti mesmu añu

La creación de la Conseyería de Cultura, Política Llingüística y Turismu y el nomamientu de Berta Piñán como la so responsable, asina como l’usu del idioma por Adrián Barbón na toma de posesión, ye motivu d’aplausu pa Iniciativa pol Asturianu. Propón al Gobiernu la puesta en marcha d’un Plan de Normalización.

Amás de reclamar que dientro de la propia de la conseyería los cargos intermedios “seyan persones que tengan sensibilidá col idioma”, y recordar que “el llabor de la política llingüística tien que ser tresversal a tola acción de gobiernu”, Iniciativa pol Asturianu ve necesario “la puesta en marcha d’un Plan de Normalización Llingüística pa qu’entame a funcionar a principiu del añu que vien, intentando aprobalu a lo llargo del últimu cuatrimestre del añu, incluyendo esti plan midíes propies y concretes pa cada estaya de gobiernu”. Nesti sen, entiende que les competencies de Política Llingüística nun s’han de diluyir “dientro de la gran conseyería creada”, polo que considera que la meyor fórmula ye “una viceconseyería con un presupuestu propiu y capacidá de trabayu tresversal na alministración autonómica”.

A Carmen Suárez Suárez, la conseyera d’Educación, la entidá pidi-y “sensibilidá y voluntá pa desarrollar los planes que permitan una mayor presencia del asturianu con mayor y meyor calidá nel sistema educativu, trabayar pa consiguir la especialidá docente, facer medrar los planes pilotu col asturianu como llingua vehicular y garantizar que l’asignatura tenga una presencia digna dientro de tol sistema educativu, incluso nes etapes nes qu’agora nun ta presente como la Educación Infantil o la FP”. Tamién cree “clave la esistencia d’un departamentu que mire pola presencia del asturianu y l’ameyoramientu de l’asignatura de Llingua Asturiana y Lliteratura”, pa lo que propón una direición xeneral dedicada a los asuntos llingüísticos dientro d’Educación.

RTPA, en Cultura

Sobre les competencies del ente públicu de comunicación, la visión d’Iniciativa pol Asturianu ye que tornen a tar embaxo’l paragües de Cultura, “y que de forma áxil se busque anovar la dirección de la mesma, con perfiles claramente favoratibles a la normalización del asturianu y creando de forma interna una dirección de conteníos n’asturianu que trabaye nesi camín tan importante de da-y más presencia al idioma na RTPA, de forma tresversal”.

Na imaxe, un momentu de la toma de posesión de Barbón como presidente d'Asturies. Semeya obra d'Armando Álvarez.