Iniciativa pol Asturianu pide la vuelta del idioma a l'Amuesa de Folclor Ciudá d'Uviéu

|
Cartelu XXVII Concurso y Muestra de Folclore Ciudad de Oviedo

Felicita al Conceyu pola aprobación de la toponimia tradicional y anima a facela presente "en tolos ámbitos".

"Dende Iniciativa pol Asturianu reclamamos la recuperación de la presencia del idioma n’alcuentros como la Muestra de Folclor d’Uviéu, onde va años yá taba presente”, demanda Inaciu Galán, presidente del coleutivu. "Yá col PP de Gabino de Lorenzo el topónimu tuvo dalguna presencia en distintes actividades rellacionaes cola conceyalía de Cultura, pero dempués l’usu del asturianu desapaeció de les actividades municipales, hasta que nesti mandatu últimu volvió a entamar a usase”, recordó a la espera de que l'eventu más importante de la canción asturiana, gaita y baille, qu'anguaño celebra la so ventena sétima edición, siga los mesmos pasos.

D'igual forma, fai un llamáu "a los responsables del conceyu a mantener un esfuerciu especial y usar el nome oficial de la ciudá y el conceyu. Nesi sentíu, sedría mui positivo, visible y barato entamar a facelo nes redes sociales corporatives del ayuntamientu y de les conceyalíes", al tiempu qu'aprovecha por felicitar al Conceyu pola aprobación de la toponimia, pendiente entovía de la so espublización nel BOPA pa entrar en vigor. "Ye una bona noticia que la capital d’Asturies dempués de tantos años tenga aprobada la toponimia y esperamos qu’a partir d’agora la toponimia oficial tenga la presencia que-y cuerrespuende pola Llei d’Usu y la llexislación española, esto ye, en tolos ámbitos oficiales ha apaecer la forma doble Oviedo/Uviéu, asina como’l restu de topónimos oficializaos”.

Contador Estadistiques