Iniciativa pol Asturianu pide al Conceyu d'Ayer compromisu pa normalizar l'idioma

La organización solicita al equipu de gobiernu municipal socialista'l cumplimientu de la toponimia y la presencia na web o nel Centru d'Interpretación Vía Carisa (CIVICA).

Felicitas Fernández, secretaria d’Iniciativa pol Asturianu, reclamó güei al Conceyu d’Ayer una mayor presencia de la llingua asturiana. “Invitamos al gobiernu d’Ayer a facer un esfuerciu pa consiguir una presencia que faiga normal l’usu del asturianu nel conceyu. Dende Iniciativa pol Asturianu creemos que puede ser un bon oxetivu en materia llingüística pa esti añu 2020 pal gobiernu municipal”, aseguró.

Tres les eleiciones de mayu ta al frente de l'alcaldía'l socialista Juan Carlos Iglesias gracies a los votos d'Ayer pela Izquierda y l'astención de Ciudadanos pa facilitar el gobiernu a la candidatura más votada, depués d'una llexislatura marcada pola negativa del tamién socialista David Moreno d'abandonar el cargu de primer edil a mandáu del partíu tres el xuiciu por posible prevaricación del que salió finalmente absueltu, lo que lu llevó a pasar al grupu de conceyales non adscritos xunto colos sos cinco compañeros. El cambiu de postura nel PSOE al respeutu del asturianu, con sofitu a la oficialidá, lleva a Iniciativa pol Asturianu a solicitar agora esi esfuerciu pa que la llingua asturiana gane presencia n'Ayer.

La secretaria del coleutivu propón modificar la páxina web del conceyu pa que l’asturianu tamién tea disponible, como asocede nes páxines municipales d’otros conceyos averaos onde l’idioma tien una presencia digna, y plantega la posibilidá de valorar l’usu del propiu topónimu (Ayer) na direición web y nes redes sociales del conceyu. "Nun hai presencia de la toponimia tradicional que ye oficial dende l’añu 2008”, denuncia Fernández.

Por último, llamenta l'ausencia del idioma nel CIVICA y pide que s'incorpore tanto la llingua asturiana como los nomes de llugar oficiales en tolos espacios municipales.

Na imaxe, logu d'Ayer, en castellanu, visible na so páxina web.