Iniciativa pol Asturianu pide a los partíos políticos qu’usen la llingua asturiana na campaña eleutoral

Les 22 formaciones polítiques que van participar nes eleiciones anticipaes del 25 de marzu recibieron una carta d’Iniciativa pol Asturianu. Nella’l coleutivu pide l’usu del idioma na campaña eleutoral y ufre asesoramientu.
 
Iniciativa pol Asturianu esplica a les formaciones polítiques “la necesidá de da-y presencia pública al asturianu dende l’ámbitu políticu, yá que nun se puede dar la espalda al idioma del pueblu al que se quier llevar a les urnes”. Por ello, pide a los partíos qu’utilicen l’asturianu “nos sos anuncios eleutorales en valles, televisión, radio y redes sociales, amás de nes intervenciones públiques de los sos líderes”. D’igual forma, recuerden que les encuestes sociollingüístiques “recueyen la voluntá de los asturianos de que los sos políticos s’espresen, polo menos dacuando, na nuesa llingua”.
 
La organización que trabaya pola normalización y el futuru de l’asturianu tamién reclama midíes “más ambicioses” pa col idioma, recordando qu’hai munches posibilidaes pa facelo “ensin qu’esto suponga nengún gastu pa l’alministración”. Amás, recordó a les fuercies polítiques que l’estatus d’oficialidá, “si bien nun ye una solución definitiva pal idioma d’Asturies, ye imprescindible p’asegurar el futuru del asturianu”. Por último, Iniciativa pol Asturianu ufre nesa carta’l so asesoramientu pa dambes cuestiones.