Iniciativa pol Asturianu insiste a Piñán sobre la “importancia de facer normal l’usu de la llingua asturiana en tola aición del Gobiernu”

La conseyera de Cultura, Política Llingüística y Turismu, Berta Piñán, y el direutor xeneral de Política Llingüística, Antón García, aconceyaron la selmana pasada con representates d’Iniciativa pol Asturianu. “Insistimos na importancia de facer normal l’usu del asturianu en tola acción del Gobiernu”, apuntó Iván Llera.

El presidente de la organización, que tuvo acompañáu por Inaciu Galán, vocal de Rellaciones Institucionales, entrevistóse per primer vegada con Piñán dende que tomara posesión del cargu. “La llingua asturiana tien que ser un elementu tresversal de trabayu nes diferentes conseyeríes del Gobiernu d’Asturies y toles estayes del mesmu. Treslladamos que l’asturianu nun puede quedar arrequexáu pa coses propies de la Selmana de les Lletres o pa lo que dependa de la Conseyería de Cultura, o depender de la bona voluntá de los responsables”, esplicó.

La quexa d’Iniciativa pol Asturiano pola ausencia del idioma en concursos o ufiertes públicos tres una convocatoria fecha dende la mesma conseyería foi recordada polos representantes de la organización, que tamién amosaron el so descontentu “colos pasos atrás na toponimia”. Nesi sen, reclamaron un esfuerciu pa que s’entaíne l’aprobación de los decretos de los doce conceyos pendientes n’oficializar los nomes de llugar tradicionales.

Por último, Llera espresó que “celebramos la bona voluntá de la conseyera y ofrecemos la nuesa collaboración y sofitu pa siguir trabayando nun espaciu d’alcuentru y de diálogu pa siguir dando normalidá y mayor presencia del asturianu na Alministración y nel Gobiernu”.

Na semeya, García, Piñán, Galán y Llera.