Iniciativa estudia xudicializar a nivel internacional l’incumplimientu de los Derechos Humanos nel Estáu en materia llingüística

El Tribunal de Strossburi/Strasbourg y el de Xusticia de la Xunión Europea podríen recibir denuncies pol incumplimientu de los Derechos Humanos nel Estáu en materia llingüística. Iniciativa pol Asturianu estudia xunto con ELEN dar esti pasu tres treslladar la situación actual a la ONX.

“Vamos mirar l’asuntu pa llevalu con xuristes y intentar presentalu nos tribunales que seyan pertinentes. Ye una cosa que ta n’estudiu, pero sí tenemos la intención de xudicializar l’asuntu y d’intentar llevalu ente los órganos internacionales correspondientes”, afirmó Inaciu Galán, presidente d’Iniciativa pol Asturianu, nel actu celebráu na sede de l’Academia de la Llingua Asturiana (ALLA) col oxetivu d’esplicar los resultaos de la Revisión Periódica Universal del Cumplimientu de los Derechos Humanos nel Estáu español por parte de la Organización de Naciones Xuníes (ONX) que tuvo llugar el miércoles pasáu. Una delegación de la Rede Europea d'Igualdá Llingüística (ELEN), ONG na que participa Iniciativa pol Asturianu, tuvo presente en Genèva pa entregar un informe sobre los casos de discriminación y ataques contra los falantes de llingües estremaes del castellanu y volvió descontenta pola “visión positivista y autocomplaciente de la so realidá interna” por parte del Estáu español nel terrén llingüísticu, asina como pola posición “tolerante y igualmente complaciente” nesta estaya de los trés países encargaos de revisar la situación de los derechos humanos: Reinu Xuníu, Sierra Lleona y Macedonia.

“Iniciativa pol Asturianu y ELEN camienten que ye inalmisible que nengunu de los estaos revisores se dignare a formular una sola entruga no tocante a los derechos llingüísticos, lo que dexa nidio la falta de compromisu real por parte de les Naciones Xuníes hacia un derechu fundamental qu’amás ta recoyíu na Declaración Universal de los Derechos Llingüísticos, ellaborada por esta mesma institución y amestada a la Declaración Universal de los Derechos Humanos”, apuntó Galán, qu’anunció que dambes organizaciones van tar presentes otra vuelta na ciudá suiza en xunu pa la sesión na que la Oficina del Altu Comisionáu pa los Derechos Humanos va evaluar el cumplimientu por parte del Estáu de la Carta Europea de les Llingües Minoritaries o Rexonales.

L’informe

El documentu presentáu por ELEN en Genèva recoyía dolcenes de casos de violación y discriminación a falantes de catalán, gallegu, eusquera, asturianu y aragonés. Nel casu de la nuesa llingua, recoyía 25 casos de finales del sieglu XX hasta l’actualidá, “mayoritariamente cometíos por parte de l’alministración pública asturiana y alministraciones llocales”. Éstos “diben dende la decision d’un xuez de nun considerer discriminatoriu multar a estudiantes d’una escuela en Villaviciosa con 25 pesetes por cada pallabra que dicíen n’asturianu, a la negación de les alministraciones llocales a almitir instancies nesta llingua, la negación a un ciudadanu asturianu de declarer na so llingua na Audiencia Nacional, o la falta de regularización de la escolarización en llingua asturiana (particularmente nes etapes pre-escolares y de Primaria)”, esplicó Galán.

El testu tamién incluyía “la falta ñidia de les sos obligaciones por parte del Estáu español a la hora de facer cumplir a la Comunidá Autónoma del Principáu d’Asturies y a los Gobiernos llocales la llegalidá vixente (Estatutu d’Autonomía y Llei d’Usu del Bable/Asturianu), qu’obliguen a un tratu igualitariu hacia los falantes d’asturianu al respective del tratu que reciben los que s’espresen en castellán”. De manera más global, nes conclusiones, ELEN apunta que “tolos casos recopilaos a lo llargo’l territoriu español amosaben una discriminación sistemática ya institucionalizada, y que la busca de xusticia al traviés de los hostiles xulgaos ta yá escosada, lo qu’afita los pegoyos p’apelar a la Corte Europea de Derechos Humanos y al Tribunal de Xusticia Européu, y posiblemente a Den Haag”, dalgo anguaño n’estudiu, como anunciara Galán.

Por último, el presidente d’Iniciativa pol Asturianu recordó que “la ferramienta necesaria pa entamar a solucionar estos problemes y dar la necesaria seguridá xurídica a los asturianos que tienen por llingua d’usu habitual l’asturianu, ye la reconocencia del asturianu como llingua co-oficial n’Asturies, xunto al castellanu, n’igualdá de condiciones. Ye la Xunta Xeneral y les formaciones que tán n’ella, los que tienen la responsabilidá de tomar la inciativa pa que la oficialidá del asturianu seya una realidá, talo y como recomienden les organizaciones ya instituciones internacionales que dende va años vienen analizando la situación sociollingüística y llegal d’Asturies”.

Antecedentes

Galán tuvo acompañáu nel actu d’esta mañana pol vicepresidente de l’ALLA, Xosé Antón González Riaño, que recordó iniciatives que llevaren enantes la situación de la llingua asturiana a nivel internacional, como la del escritor Xuan Santori, en representación de la Xunta pola Defensa de la Lllingua Asturiana, que presentó un informe na Oficina d’Asuntos Llingüísticos de la Organización de Naciones Xuníes en Nueva York, y llueu na Unesco en París, “que facía referencia a la situación del asturianu y la rellación del asturianu colos Derechos Humanos”. Tamién apuntó que la propia Organización de les Naciones Xuníes pa la Educación, la Ciencia y la Cultura (Unesco) “vien espublizando l’Atlas Mundial de les Llingües en Peligru de Desapaición y nel so últimu informe, del 2010, fai una referencia al peligro que cuerre la llingua asturiana si nun se tomen les midíes afayadices”.

Na semeya, González Riaño y Galán.