Iniciativa pol Asturianu entama esta seronda cursos de teatru y d'introducción al cómic

|
Logu Iniciativa pol Asturianu

Van ponelos Sergio Buelga y Ruma Barbero.

Xixón va ser sede de dambes iniciatives, que se sumen a los yá habituales cursos de llingua asturiana qu'Iniciativa pol Asturianu entama toles serondes y que nesta ocasión van desendolcase en Xixón, Uviéu, Avilés y Llaviana, toos ellos de nivel 1, cola opción de facelo en llinia (tamién el de nivel 2). L'actor y codireutor escénicu de la Compañía Asturiana de Comedias, Buelga, va encargase del taller de teatru, que va dar comienzu'l 6 de payares nel espaciu cultural La Manzorga.

Los participantes nél van disponer d'unes ferramientes básiques pa poder acarar, de forma afayadiza, una creación actoral propia, sía individual o coleutiva. Les actividaes dirán empobinaes a desendolcar les diferentes téuniques actoralesindividuales (ortofonía y dicción, comprensión de testos, declamación, espresión corporal o improvisación) y dinámiques coleutives (escenificaciones, improvisación de métodu, dramatizaciones de testu o coru), deteniéndose a trabayar con exemplos propios del fechu teatral asturianu.

El taller va tener un llargor de 40 hores, con clase los llunes de 18 a 20 hores. El preciu de matrícula ye de 60 euros.

Blogue de siguimientu del cursu

La otra novedá de los cursos d'Iniciativa pol Asturianu d'esti añu ye'l d'Introducción al Cómic, que va poner Barbero. Ésti cuenta con 36 hores llectives nes que'l dibuxante va repasar los distintos estilos y formatos presentes nel cómic, dende les primeres manifestaciones hasta los enclinos más actuales.

El xixonés dirá realizando amás un blogue de siguimientu del mesmu, nel que puedan dir xubiéndose a la rede los trabayos remataos o queden éstos llistos pa una futura publicación impresa. Esto ye, van conocese tolos pasos a dar dende la mesa de dibuxu hasta la so publicación.

El trabayu va siguir siempres les mesmes pautes en cada unidá didáctica: visionáu y analís de trabayos, con atención especial a los autores asturianos; propuesta de práutica en común; desarrollu del guión; y dibuxu de la historieta. Amás, van dase a conocer a los alumnos los premios y concursos de cómic esistentes, animando a participar nellos, sobre manera nel Alfonso Iglesias que convoca tolos años la Conseyería d'Educación y Cultura dientro de los nomaos Premios Lliterarios.

Les clases van desendolcase dende'l 6 de payares tolos llunes, de 19 a 21 hores, nel Conseyu de Mocedá de Xixón. El preciu pa matriculase ye de 120 euros y la xente interesao nesti cursu o en cualquier otru de los qu'entama Iniciativa pol Asturianu pa esta seronda pue formalizar la so inscripción al traviés d'esti enllaz.

 

Contador Estadistiques