Iniciativa pol Asturianu entama cursos n'Avilés, Xixón, Uviéu y Sotrondio

El d'Avilés correspuende a nivel básicu, mentes que los restantes tán empobinaos a persones con un conocimientu más fondu del idioma. El plazu p'apuntase amplíase hasta'l 27 de marzu, cola posibilidá de facer el cursu d'iniciación tamién a distancia.

Les clases van desendolcase, a partir del 28 de marzu, los llunes y miércoles de 19 a 21 hores, a esceición del cursu de Sotrondio, que va tener llugar los martes y xueves de 18.30 a 20.30 hores. Hasta'l momentu yá hai mediu centenera d'inscripciones pa estos programes formativos qu'entama Iniciativa pol Asturianu en collaboración cola Academia de la Llingua Asturiana (ALLA).

El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l'ALLA, entidá reconocida pola Conseyería d’Educación y Cultura pa la formación del profesoráu. El nivel II, pela so parte, ta destináu a persones con una conocencia más fonda del idioma, que yá ficieren dalgún cursu enantes o tengan l’asturianu como llingua familiar.

El preciu de la inscripción ye de 60 euros (50 pa los socios d’Iniciativa pol Asturianu), incluyendo los materiales necesarios pa llevar alantre’l cursu. Les inscripciones pueden facese na páxina web d’Iniciativa pol Asturianu o nel teléfonu 615.982.816, yá sía llamando o al traviés de WhatsApp o Telegram. La fecha llende pa matriculase ye, tres l'ampliación, el 27 de marzu.

Les clases van desendolcase nel IES Carreño Miranda (Avilés), nel Conseyu de la Mocedá de Xixón, nel Conseyu de la Mocedá del Principáu d'Asturies (Uviéu) y na Casa de la Mocedá de Sotrondio. El númberu d'hores llectives ye 36, con final del cursu previstu pa últimos de mayu.

Una bona forma d'averase al idioma

Iniciativa pol Asturianu anima a la ciudadanía a partipar nestos cursos, que son una continuación de los que se celebraron mientres la seronda en dellos conceyos del país. "Va sirvir pa dar una conocencia básica y adaptada al nivel del alumnáu de la llingua asturiana, deprendiendo les normes ortográfiques, vocabulariu y otres cuestiones, con una clases amenes que van apoyase n’elementos audiovisuales, trabayando tamién cuestiones rellacionaes cola sociollingüística y la cultura d’Asturies", espliquen dende'l coleutivu.

Les persones de fuera d'Asturies o que, por temes d'horarios, nun pueda desplazase a los puntos físicos onde van ponese les clases, tienen la posibilidá de facer el cursu a distancia al traviés d'Internet. El qu'escueya esti sistema dispondrá d'una plataforma dixital cola que poder dar el cursu nel horariu más afayadizu pa so.