Iniciativa pol Asturianu demanda que l'idioma tea presente na negociación presupuestaria

Considera importante la meyora de conteníos na RTPA con midíes que garanticen el so usu na programación del ente públicu.

Inaciu Galán, presidente d’Iniciativa pol Asturianu, demanda que “l’asturianu tea presente na negociación presupuestaria pa que l'idioma recupere tarrén dempués d’una década de recortes. Dende Iniciativa pol Asturianu paezmos que ye un momentu pa trabayar na normalización del asturianu dientro de l'alministración asturiana, agora que'l consensu n'avanzar na normalización ye más grande que nunca". Ún de los puntos clave nesti camín ye'l de los medios públicos: "Ye necesario garantizar la presencia y un bon usu del idioma dientro del ente públicu”.

"Proponemos que se meyore esta presencia cola creación d'estructures que permitan que se convierta nun axente activu del procesu de normalización, como yá lo son los conceyos al traviés de los Servicios de Normalización Llingüística, el Gobiernu d'Asturies al traviés d'una dirección xeneral o la Universidá d'Uviéu, con una estaya dedicada a la normalización.  L'ente tien qu'asumir el papel normalizador del asturianu y pa ello ha tener y han d'apurrise los recursos necesarios pa ello”, añadió.

Amás, el presidente d'esti coleutivu anunció que “vamos facer llegar estes propuestes a los grupos parllamentarios de la Xunta Xeneral p'afalalos a trabayar nesti sen”. Recordó, sicasí, que "ye importante que se trabaye en polítiques de normalización llingüística tresversal. Toles conseyeríes habríen dedicar recursos, y sobre manera voluntá, a normalizar l'asturianu nel so ámbitu. Nun pue ser que Sanidá, Presidencia o Empléu, Industria y Turismu, por poner dos exemplos, nun faigan nada pola normalización del asturianu. Ésta nun ye una cuestión namás de la Conseyería d'Educación y Cultura, sinón de tolos ámbitos de xestión". 

Pa ello, Iniciativa pol Asturianu propón crear llínies de trabayu en toles conseyeríes, y pide a los partíos que tán nestos momentos negociando los presupuestos, y que tienen en marcha la reforma estatutaria pa incluyir la oficialidá, "que faigan un esfuerciu por consiguir avances presupuestarios que permitan siguir avanzando nesi sen, construyendo una mayor presencia del idioma en tolos ámbitos".

Na imaxe, un momentu de la reunión ente'l Gobiernu de la FSA y Podemos por cuenta los presupuestos celebrada'l llunes. Semeya obra d'Armando Álvarez.