Iniciativa pol Asturianu cree beneficioso pa la normalización un logu del Gobiernu billingüe

El Gobiernu entamó a emplegar una imaxe nueva n’Internet, con trés logos diferentes: en castellanu, n’asturianu y en gallego-asturiano. Iniciativa pol Asturianu reclama que, al igual que fai l’Executivu vascu o navarru, s’aproveche’l cambiu pa usar un logu billingüe “pa una meyor promoción y normalización de los idiomes”.

L’usu que se ta dando nestos primeros díes a dicha imaxe ye de manera monollingüe. Asina, na versión n’asturianu de la web del Gobiernu rescampla na parte superior izquierda’l logu en dichu idioma, mentes que na que sal por defeuto en castellanu y nel restu de páxines institucionales, inclusive la de Política Llingüística, apaez nesta otra llingua.

“Iniciativa pol Asturianu valora que se recueyan les tres llingües, pero apuesta pol usu de la doble denominación dentro del mesmu llogotipu, pa que tean presentes el castellán y l’asturianu o l'eonaviegu. D’esta manera ,fadríase una meyor promoción y normalización de los idiomes”, argumenta esti coleutivu, que pon l’exemplu d’Euskadi y Navarra.

Tamién cita’l de Galicia, onde namái s’usa la versión gallega, fórmula que desea p’Asturies. Asina apuesta por que “los nomes de les instituciones lleven namás les llingües propies, yá que ye un usu simbólicu d'especial relevancia que nun requeriría traducir los nomes”.

Desapaez la pallabra ‘Gobiernu’

Na imaxe nueva del Gobiernu desapaez tamién esta pallabra, presentado namái l’escudu del país con un color azul escuru o blancu, según el fondu, y el nome de la comunidá autónoma. Los trazos de la insinia simplifíquense, siguiendo la tendencia actual no que respeuta a logos pal so usu en soportes dixitales.

Na imaxe, la versión en castellanu y n'asturianu del logu nuevu del Gobiernu.