Iniciativa pol Asturianu continúa la so ronda de contautos con conceyos con IX y Bloque-UNA-LV-GV

Tres aconceyar con Foro de Ciudadanos, Iniciativa pol Asturianu continuó la so ronda de contautos con un alcuentru con Izquierda Xunida. El xueves, representantes del coleutivu van reunise col Bloque por Asturies-UNA-LV-GV.
 
Estes trés formaciones son les que respondieron hasta’l momentu’l pidimientu del coleutivu pa celebrar aconceyamientos colos partíos que se presente a les eleiciones col oxetivu de tocar el tema llingüísticu. Dende Iniciativa pol Asturianu demanden que “les fuercies polítiques usen l’asturianu nos sos anuncios eleutorales en valles, televisión, radio y redes sociales, amás de nes intervenciones públiques de los sos llíderes, como meyor forma d'amosar el so compromisu col idioma”. Tamién ufren asesoramientu y collaboración en cuestiones llingüístiques, y recuerden que se pueden facer munches coses pol idioma ensin gastu nengún pa l’Alministración.
 
La diputada Emilia Váquez foi la responsable de la coalición que tomó parte nel aconceyamientu celebráu ayeri colos representantes d’Iniciativa pol Asturianu, que reconocieron la importancia que tien qu’Izquierda Xunida lleve nel so programa eleutoral la oficialidá de la llingua asturiana. Mañana, el coleutivu que trabaya pola normalización del asturianu va continuar coles reuniones, a les 18.45 hores, con un alcuentru col Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV).