Iniciativa pol Asturianu considera que’l nomamientu de Virgili ye “una mala noticia pal idioma”

"El señor Virgili nun paez pol llabor de que la RTPA seya una ferramienta positiva pal asturianu”, apunta la organización. Afirma que la programación futura “va ser más de lo mesmo”.

El pautu ente PSOE, PP y IX que ta acabante d’anunciase alredor de l’anovación de la dirección de la RTPA pol qu'Antonio Virgili va continuar na direición xeneral del ente, un cargu nel que lleva en funciones dende’l 2011, "nun ye una bona noticia pa la llingua asturiana", afirma Iniciativa pol Asturianu. "Una radiotelevisión asturiana tien sentíu siempres que seya una ferramienta vertebradora de la sociedá, divulgadora de la so realidá y normalizadora de les llingües d’Asturies. Lo contrario ye un marafundiu de perres inesplicable cuando cuntamos con una canal pública en castellán con desconexones p’Asturies, y con decenes de canales privaes”.

Pa la organización "el señor Virgili nun paez pol llabor de que la RTPA seya una ferramienta positiva pal asturianu. Nos años que lleva al frente de la mesma nun pudo sentise nin un minutu d’informativos televisaos n’asturianu, malapenes pudimos ver dos o trés películes doblaes y los programes n’asturianu que s’emitieron tuvieron un claru elementu diglósicu na mayor parte los casos. L’asturianu quedó fuera de los espacios clave pa la prestixación d’un idioma y pa la tresmisión xeneracional del mesmu".

Por esti motivu, la continuidá de Virgili supondrá, n’opinión d’Iniciativa pol Asturianu, “más de lo mesmo” na programación de la RTPA.