Iniciativa pol Asturianu afirma que l'anulación del Plan de Carreño "nun tien base xurídica"

Esixe a Gabino de Lorenzo, delegáu del Gobiernu estatal, "que retire esta orde".

"Esti nuevu ataque políticu contra l'asturianu del Partíu Popular ye especialmente llamentable, pues usa ferramientes del Estáu y oculta cola apariencia d'una decisión xurídica lo que nun ye más qu'un nuevu intentu de da-y un golpe más al asturianu", espliquen dende Iniciativa pol Asturianu, que recuerda que "los planes de normalización lleven décades funcionando ensin nengún tipu de problema xurídicu en munchos conceyos asturianos y la so reclamación nun tien base xurídica, pues la Llei d'Usu del asturianu permite a los Conceyos esti tipu de midíes".

D'igual forma, solicita al equipu de Gobiernu "que se niegue a acatar esta sentencia y que sigan la llucha nos tribunales hasta acabar toles posibilidaes". Tamién considera que "el Gobiernu d'Asturies habría da-y sofitu inmediatu a Carreño nesta situación y mediar col Gobiernu d'España pa que retiren esti ataque inxustificáu".