Iniciativa pide-y al PP que se sume al consensu pa financiar a l'Academia de la Llingua Asturiana

Iniciativa pol Asturianu vuelve pidir a los grupos del Congresu que los presupuestos enxerten una partida pa l'ALLA

Iniciativa pol Asturianu vien proponiendo dende 2013 a los grupos políticos con representación por Asturies nel Congresu la presentación d’enmiedes a los Presupuestos Xenerales pa que l'Academia de la Llingua Asturiana cunte con una partida, como tienen la española, catalana, vasca y gallega, amás d’otres instituciones académiques presentes nuna partida dedicada a la so financiación.

La propuesta cuntó con un gran alcuerdu nel parllamentu nos últimos dos años, colos votos favorables de tolos grupos, menos el PP y UPyD.

Esti añu la organización volvió solicita-yos a los grupos nel Congresu la presentación d'una enmieda parcial a los Presupuestos Xenerales del Estáu que reclame una partida pa l'Academia de la Llingua Asturiana, qu'acabe con esti agraviu y lo que considera una inxusticia pa la llingua asturiana.

Nesta ocasión, y col envís de da-y visiblidá al consensu alredor d’esti tema, Iniciativa solicitó a los diputaos que la enmieda seya conxunta ente tolos diputaos asturianos nel Congresu, esperando y volviendo a pidir al PP que se sume a esta moción y desbloquie esta partida pa l’ALLA, que nun ye más que la busca d’igualdá ente les academies que representen y curien les llingües del estáu.

Nos Presupuestos de 2015 la Real Academia Española tuvo una partida de 1.618.910 €, l'Institut d'Estudis Catalans de 273.070 €, la Real Academia Galega de 273.070 € y l'Academia de la Lengua Vasca (Euskaltzaindia) de 143.180 €, amás, la Comisión Permanente de la Asociación de Academias de la Lengua Española tien un prespuestu asignáu de 74.560 euros.

Los diputaos represenantes d'Asturies nel Congresu formen parte del PP, PSOE, Izquierda Xunida y Foro Asturies.