Iniciativa llama a los partíos a sumase al consensu constitucional "mayoritariu" pol idioma

El coleutivu felicita a Foro "por reconocer la necesidá de da-y solución constitucional" al asturianu y apunta que "ye'l momentu de sentase a falar" sobre los pasos a dar.

Llueu de la celebración del IV Congreso Extraordinario de Foro Asturias, entamáu de manera telemática baxo’l lema ‘Refundarse para centrarnos en Asturias’, Iniciativa pol Asturianu quixo amosar la so norabona "por esi pasu alantre en defensa de la pluralidá llingüística y por recoyer nos Estatutos del partíu el reconocimientu a les llingües propies d’Asturies, y por reconocer tamién la necesidá de da-y solución constitucional al asturianu". Celebra que la formación presidida por Carmen Moriyón "recupere esa defensa del asturianu, recoyéndolo amás na norma cimera interna del partíu, y que dempués d’un tiempu d’indiferencia y confrontación col idioma, torne una postura asemeyada a la que se tenía nos entamos del partíu".

"Nel trabayu que'l conxuntu de la sociedá y los axentes sociales y políticos tenemos por delante nun sobra naide, polo tanto, ye mui bona noticia ver como Foro Asturies recupera esi respetu a la cultura y a les llingües d’Asturies", añade nun comunicáu. Por esti motivu, fai un llamáu a tolos partíos "a sumase a esti mayoritariu consensu constitucional y a ser conscientes de que con esti cambéu y con esta realidá ye’l momentu d’entamar a sentase y falar de los posibles pasos a siguir nuna reforma estatutaria y nun perder más tiempu".

Na semeya, Adrián Pumares, secretariu xeneral de Foro y diputáu, na so intervención nel congresu.