Iniciativa fai públicu na sede de l'ALLA l'informe de la so intervención na ONX

Inaciu Galán y Marissa Bordallo  llamen a les autoridaes del Estáu español a tomar midíes pa garantizar la fin de la discriminación de les llingües d’Asturies

Roberto González-Quevedo, secretariu de l’Academia de la Llingua Asturiana (ALLA), encargóse de recibir el dossier y de conducir un actu que se desendolcó na propia sede de la institución col oxetivu de que’l presidente y la responsable d’Activismu nes Redes Sociales d’Iniciativa pol Asturianu presentaren los resultaos de la so visita a Genèva  pa participar nel XXIX Conseyu del Altu Comisionáu de Derechos Humanos de la Organización de Naciones Xuníes (ONX).

Quevedo emponderó “el llabor mui intensu a favor del asturianu na so faceta social” que fai la organización dende la so creación y señaló la disposición de l’Academia d’apoyar “toda iniciativa a favor de la llingua asturiana”.

Bordallo, mentes, recordó que la cuestión llingüística ye una estaya más de los derechos humanos, “onde nun hai derechos de primera o de segunda”, y calificó la fecha del 26 de xunu como histórica pal idioma. Esi día, el xueves pasáu, ye cuando la situación de la llingua asturiana llegó a la ONX de la mano de European Language Equality Network (ELEN), organización d’ámbitu européu que trabaya na promoción de les llingües minoritaries y de la que forma parte Iniciativa pol Asturianu.

Na sesión de control a España del Altu Comisionáu de Derechos Humanos de la ONX, a la qu’acudieron Bordallo y Galán, “denunciáronse delles situaciones por parte de diferentes grupos y ONG, como la Llei Mordaza o los problemes na llende de Ceuta y Melilla”, ente otros. “Nós pudimos presentar la situación d’esclusión y desprestixu que sufre l’asturianu y los sos falantes anguaño”, continuó.

Tamién tuvieron oportunidá de falar col primer secretariu de la Comisión Española Permanente nes Naciones Xuníes, Vicente Cacho, sobre la cuestión asturiana, y visitar el Centru Asturianu de Genèva, dexando víes abiertes a una collaboración conxunta pa la promoción del asturianu.

“La nuesa llingua importa nel mundu. Tamos convencíos de que, sía cuál sía’l resultáu futuru d’esta aición, foi un fitu que marca l’entamu del ameyoramientu del presente de la llingua de nueso. Un viaxe nel que la responsibilidá nun foi poca; esperamos que los asturianos consideren que tuviemos al altor de les circunstancies”, finó Bordallo.

Desconocimientu de la postura del Gobiernu d’España

Galán, pela so parte, repasó los acontecimientos previos a la presencia’l xueves nel XXIX Conseyu del Altu Comisionáu de Derechos Humanos, como foi la entrega d’un informe énte la ONX a principio d’años al traviés del responsable de Rellaciones Internacionales, Xosé B. Álvarez. “Naquel informe, que presentábemos equí tamién y que yera conxuntu col restu de los idiomes distintos del castellán n’España, denunciábemos la situación de desigualdá de los falantes d’asturianu y galllego-asturianu nel ámbitu d’Asturies, asina como los casos de discriminación sobre ciudadanos por usar o querer usar la so llingua propia en distintos ámbitos”, esplicó.

“Na nuesa declaración nel plenu del Altu Comisionáu de Derechos Humanos en Xinebra, dimos anuncia de la discriminación llingüística sistemática ya institucionalizada que viven los falantes d’asturianu, y de la que son responsables, tanto’l Gobiernu d’Asturies como’l Gobiernu d’España, incumpliendo la llexislación autonómica y estatal, asina como los trataos internacionales roblaos por España, talos como la Carta Europea de les Llingües Minoritaries, rafiticada pol estáu español en 2001, incluyendo la protección del asturianu, ya incumplida dende entós de forma constante”, esplicó’l presidente d'Iniciativa, qu’añadió que la embaxadora d’España na ONX “nun respondió a les nueses reivindicaciones nin nun sentíu nin n’otru, y polo tanto desconocemos la postura del Gobiernu d’España, acullá de la continua falta d’acción y cumplimientu de la responsabilidá na promoción y normalización del idioma, que comparte col principal responsable d’esta situación, el Gobienu d’Asturies”.

L’Altu Comisionáu de Derechos Humanos emitirá agora un informe de lo tratao na sesión del xueves, pero Iniciativa pol Asturianu nun quier dexar pasar el tiempu y va pidir “al Conseyu de Derechos Humanos, col sofitu de los Estaos Miembru, que tomen les midíes necesaries y que llamen a les autoridaes competentes nel Estáu español a rindir cuentes y tomar midíes pa garantizar la fin de la discriminación de les llingües d’Asturies”.

“Les instituciones asturianes han tomar mui en serio esta situación, yá que l’atención d’organismos como l’Altu Comisionáu de los Drechos Humanos de la Organización de les Naciones Xuníes demuestra que la cuestión perxudica la imaxe de la democracia española y asturiana, con situaciones más propies d’estaos con sistemes totalitarios, que d’estaos modernos y plurales onde se respeta la diversidá llingüística de la so población”, finó Galán

“Aspeutos positivos”

Entrugáu pola postura de l’ALLA énte la llexislatura nueva, González-Quevedo apuntó que tovía tán pendiente de la formación de Gobiernu pero apuntó que vio dellos “aspeutos positivos, como que na toma de posesión de los diputamos unos cuantos utilizaron l’asturianu como llingua vehicular”. “L’Academia va tar como siempres faciendo tolo posible pa llograr la meyora de la situación del asturianu a nivel llegal, social y de visibilidá”, concluyó.

Na semeya, Bordallo, González-Quevedo y Galán.