Iniciativa diríxese a AENA pa reclamar la presencia del asturianu nel aeropuertu

|
Aeropuertu d'Asturies cartelos

"Permitiría da-y normalidá, visibilidá y reconocimientu a la llingua asturiana", diz.

L'emplegu del idioma na cartelería del Aeropuertu d’Asturies y l’usu de la toponimia oficial son dalgunes de les reclamaciones qu’Iniciativa pol Asturianu fixo llegar a la empresa Aeropuertos Españoles y Navegación Aérea (AENA). La entidá rexistró una solicitú pa incorporar la llingua asturiana na cartelería y informaciones o llocuciones del espaciu d'aviación.

"D’esta manera, l’idioma alcontraríase en condiciones d’igualdá respeuto al restu de llingües cooficiales", yá qu'anque entá nun sía oficial "ta reconocida nel Estatutu d’Autonomía del Principáu d’Asturies y la propia Constitución Española reconoz, nel so artículu 3, que la riqueza de les distintes modalidaes llingüístiques d’España ye un patrimoniu cultural que será oxetu d’especial respetu y protección". Nesi sen, la organización de reivindicación llingüística recuerda que yá hai casos d’idiomes, como l'inglés y l'alemán, que nun siendo oficiales n’España sí tán presentes na cartelería de dellos aeropuertos.

Por último, Iniciativa pol Asturianu solicita al organismu que nes campañes informatives que s’entamen dende l’Aeropuertu d’Asturies y nes bienllegaes a los turistes tea presente tamién la llingua asturiana.

Na semeya, indicadores del Aeropuertu d'Asturies, n'inglés y en castellanu.

Contador Estadistiques