Iniciativa pol Asturianu considera “incomprensible y deceicionante” l’usu del castellanu na marca ‘Sidrerías de Asturias’

La marca de calidá ‘Sidrerías de Asturias. Calidad natural’, al igual que les anteriores creaes pol Gobiernu, va tener denominación namái en castellanu. Pa Iniciativa pol Asturianu esta decisión ye “incomprensible y deceicionante”, más nesti casu concretu al ser la llingua asturiana un fechu inseparable de la cultura sidrera.

La organización que trabaya na defensa de los derechos de los falantes y na normalización del idioma cree positivo la creación d’esta marca de calidá pero espresa que “nun puede caenos embaxo, por embargu, la falta d’usu del asturianu nel nome de la marca: ‘Sidrerías de Asturias, Calidad Natural’. Pa Iniciativa pol Asturianu esta ye una falta incomprensible y deceicionante, sobre manera tratándose de dalgo circunscrito al ámbitu asturianu y nun entornu tan tradicional y onde l’asturianu tien una presencia tan mayoritaria, como’l campu  de la sidra”. D’igual forma, recuerda cómo la presencia del asturianu nos chigres del país ye importante, destacando l’usu con normalidá de  lletreros tan familiares pa tolos ciudadanos como ‘nesti chigre pue cantase’, ‘homes’ y ‘muyeres’ nos baños, y ‘abierto’ y ‘pesllao’ na puerta, ensin escaecer l’emplegu del idioma pa la mayoría de los nomes de los establecimientos.

Como comparanza, Iniciativa pol Asturianu pon l’exemplu d’Euskadi, onde la so cultura sidrera nun s’entiende ensin l’usu del eusquera, dalgo que nun supone torga nenguna pal turismu. “Ye necesario que la marca recueya l’usu del asturianu como un elementu a tener en cuenta nos parametros p’acoyese a la mesma, asina como que’l propiu sellu de calidá tenga’l nome na nuesa llingua ‘Sidreríes o Chigres d’Asturies, Calidá Natural’. Y ye que lo que se viende ye tamién la esperiencia, un pedazu de la cultura, una escena de los nuestros vezos y l’idioma ye una parte tresversal ensin la que’l conxuntu queda incompletu ya incoherente. La particularidá cultural ye un valor añadío qu’atrapa l’interés de los visitantes y el nun la enarbolar ye un menospreciu de lo de puertes pa dientro y un desaprovechamientu de puertes pa fuera”, alvierten.

Compromisu cola calidá

‘Sidrerías de Asturias. Calidad Natural’ súmase a otres marques creaes pola Conseyería d’Economía y Emplegu, como ‘Casonas Asturianas’ pa hoteles rurales, ‘Mesas de Asturias’ pa restoranes de comida del país, y ‘Aldeas de Asturias’ pa cases d’aldea y apartamentos rurales, cola fin d’ameyorar la calidá y atraer turismu. Podrán mostrar esti sellu “los establecimientos hosteleros, tanto restoranes como chigres, que poles sos carauterístiques singulares, compromisu cola calidá y cuidáu especial del elementu diferencial del escanciáu tradicional, puedan presentase al mercáu turísticu como modelu de referencia de les sidreríes asturianes”.