Iniciativa pol Asturianu asitia a González “nel llau de los que destruyen a la llingua asturiana”

El trabayu d’Ana González na llexislatura no que respeuta a la política llingüística nun foi satisfactoriu pa Iniciativa pol Asturianu. El coleutivu asitia a la conseyera d’Educación, Cultura y Deporte “nel llau de los que destruyen a la llingua asturiana” al dexar al idioma nuna situación peor que nel 2012.

“Siempre tien mui bones pallabres pa col asturianu y dende qu’entró nel so cargu fizo munches promeses: solucionar el problema del profesoráu de Llingua Asturiana, dar pasos alantre na normalización del idioma, avanzar nel procesu d’oficialización de la toponimia, etc.”, espliquen dende Iniciativa pol Asturianu, organización qu’entiende que’l legáu que dexa “ye una llaceria; una riestra de pasos atrás que lleven al asturianu a una situación peor entá de la que tenía cuando ella ocupó’l so cargu en 2012”. La non creación de la especialidá docente de Llingua Asturiana y Gallego-asturiano, dalgo que González prometiera a primeros de la llexislatura, ye una de les crítiques mayores que recibe nel ámbitu educativu, ensin escaecer los pasos atrás daos na eduación non universitaria “faciendo que l’asignatura d’asturianu tuviera de competir con Cultura Asturiana en Primaria –incumpliendo la llei, qu’establez que tien de ser asignatura voluntaria, non optativa– y dempués recortando nun 75 por cientu la presencia de Llingua Asturiana nel ciclu de Bachilleratu, de 4 a 1 hora selmanal”.

Sobre’l Plan de Normalización, Iniciativa pol Asturianu apunta que ye dalgo de lo que “nin se fala nin s’espera d’ella que lu eche alantre”. “La so política foi la d’afogar a les poques y pequeñes editoriales que queden editando n’asturianu con abusives condiciones y costoses xestiones pa poder algamar les probetayes ayudes a la edición”, continúa. La situación de la toponimia tampoco nun se salva al ceder “a les presiones de los medios de comunicación más enemigos del idioma d’Asturies”, recuperando nomes de llugar castellanizaos en Bual y Carreño, y non utilizar los oficiales dende la so conseyería. D’igual forma, recuerda que dende qu’entamó’l procesu hai diez años foi la primer vegada que nun hebo avances nesti campu, con una Xunta de Toponimia “paralizada”.

“Por too ello, el legáu de la señora conseyera al frente de la Política Llingüística d’Asturies define’l so papel na historia nel llau de los qu’ayuden a la destrucción d’esta llingua, col sofitu absolutu del so partíu y del Gobiernu del señor Javier Fernández”, fina esti análisis la organización que trabaya na normalización del idioma coincidiendo col final de la llexislatura.