Iniciativa pol Asturianu alerta de que’l SNL de Mieres lleva paráu más de dos meses

El Serviciu de Normalización Llingüística de Mieres nun tien actividá dende la entrada del 2015, según alerta Iniciativa pol Asturianu. Esta organización reclama al Conceyu que “se responsabilice y vuelva a ponelu en marcha”, y esixe una partida nos presupuestos municipales pal mesmu.

Los presupuestos nacionales aseguren una asignación pa esti serviciu en Mieres, pero’l final del 2014 supunxo la so paralización hasta’l día de güei, al igual que n’años anteriores. “N’otros Conceyos yá decidieron la continuidá de los Servicios nel mes de xineru, con bon criteriu, col aquel de nun parar l’actividá normalizadora tan necesaria nesti ámbitu”, recuerda Iniciativa pol Asturianu, que nun quier escaecer que “les condiciones llaborales de los téunicos y téuniques d’estos servicios son bastante llacerioses, como yá denunciaron hai poco nun comunicáu col qu’Iniciativa pol Asturianu amosó la so solidaridá”.

Esta supensión del trabayu del SNL “nun ayuda pa nada nel llogru de los oxetivos de fomentar l’usu del asturianu polos que se crearon” estes oficines municipales, al igual que perxudica’l trabayu de los téunicos, “que requier un mayor espaciu temporal pa la ellaboración de campañes y otres actividaes a llargu plazu”. Poro, Iniciativa pol Asturianu encamienta al alcalde Aníbal José Vázquez Fernández que “reclame a la Conseyería d’Educación y Cultura una mayor aportación económica y una seguridá nes feches de pagu, pero nun ye menos importante qu’estos servicios, que son propios de l’alministración llocal, tengan tamién un presupuestu nes partíes del Conceyu, como parte del compromisu asumíu poles autoridaes de Mieres nesti ámbitu. Nun basta con esperar a que los recursos vengan d’otres alministraciones, el Conceyu ha invertir nesti serviciu que xenera un importante serviciu a ciudadanos, empreses y otres entidaes”.

Compromisu d’Izquierda Xunida

D’igual forma, la organización que trabaya na normalización del idioma en tolos ámbitos esixe a Vázquez Fernández la reactivación del serviciu y recuerda-y que “la so formación, Izquierda Xunida, lleva nel programa la oficialidá del asturianu, y que la falta de midíes de normalización llingüística nun empata bien con estes promeses eleutorales”.