Iniciativa afala a los conceyales eleutos a qu’usen l’idioma al prometer o xurar el cargu

Nos próximos díes 78 alcaldes y 942 conceyales van prometer o xurar el so cargu, según el modelu qu’escueyan.

Iniciativa pol Asturianu afala a estes persones elixíes pola ciudadanía a qu’empleguen la llingua y l'eonaviego nes sos tomes de posesión p'amosar el so compromisu pa col idioma.

“Esti añu, y agora que’l compromisu cola oficialidá del asturianu tien más sofitu políticu esplícitu que nunca nes instituciones, ye un bon momentu pa poner en práctica una de les ferramientes más útiles y más cencielles de da-y promoción al idioma, usala de forma normal ente los representantes públicos”, apunten dende la organización, que recuerda qu’esta fórmula yá foi utilizada anteriormente por conceyales, diputaos y hasta pola eurodiputada Estefanía Torres. Sicasí, Iniciativa pol Asturianu entiende que’l sofitu al idioma nun debe quedar namái nesti xestu, sinón qu’ha d’acompañase “dende’l primer día con midíes ya iniciatives empobinaes a meyorar la situación del asturianu nel ámbitu de los conceyos, onde ye necesario usar l’asturianu, aprobar ordenances de normalización o poneles en marcha ellí onde yá esisten, da-yos un meyor usu y estabilidá a los servicios de normalización llingüística y facer polítiques tresversales que-y dean presencia al asturianu en tolos ámbitos de la xestión de los conceyos”.

Pa facilitar esti procedimientu, l’asociación presidida por Inaciu Galán ufre’l so asesoramientu llingüísticu a toles persones eleutes y propón el testu a utilizar nes tomes de posesión. Asina, nel casu de conceyales espón “xuro/prometo, pola mio conciencia y honor, cumplir con fidelidá les obligaciones del cargu de conceyal con llealtá al Rei, y curiar y facer curiar la Constitución como Norma Fundamental del Estáu”. Mentes, pa los alcaldes cita’l siguiente: “Xuro/Prometo cumplir con fidelidá les obligaciones del cargu d’Alcalde/esa Presidente/a del Escelentísimu Conceyu de (xxx) con llealtá al Rei, y curiar y facer curiar la Constitución como Norma Fundamental del Estáu".