Infraestructures va ameyorar la seguridá nel tramu ente Riañu y Tarna

Tamién na AS-19 cola construcción d'una rotonda frente al polígonu de Falmuria.

La Conseyería d'Infraestructures, Ordenación del Territoriu y Mediu Ambiente entama obres p'ameyorar la seguridá de l’AS-117 y l'AS-19, les dos víes de la rede nacional nes que l'Asociación Española de la Carretera deteutó tramos de peligrosidá elevada. Nel primer de los casos, la carretera que xune Riañu col puertu de Tarna, van executase trabayos presupuestaos en 1.499.055 euros que van tar remataos en siete meses dende la so axudicación.

Nesta vía identificáronse dos tramos de concentración d'accidentes, dambos asitiaos ente la ponte atirantada de Sama y l'enllaz de Ciañu, en Llangréu. Pa iguar los problemes descritos proyeutóse, per un llau, la renovación del pavimentu ente los puntos quilométricos 7,700 y 19,700, que va facese mediante la estensión de dos capes de microaglomerao, previu saniamientu y regularización onde sía menester.

Per otra parte, analizáronse tolos aspeutos qu'inflúin sobre los niveles de riesgu nel tráficu y proyeutáronse delles actuaciones p'ameyorar la seguridá vial, tales como la reposición de la señalización horizontal nos tramos onde se realiza la meyora del firme, la reposición de señales verticales deterioraes y la instalación de cartelos de tramu de concentración d'accidentes en cada sentíu de la circulación.

Nos túneles de Sotrondio van reponese dellos indicadores pa reforciar la percepción del borde de la calzada y dellos tramos de barrera de seguridá. Los trabayos tamién inclúin la sustitución y pintáu de delles partes de la barandiella metálica na ponte asitiada a la salida de Sama, con anovamientu del pavimentu y la señalización de la so pasarela peatonal.

Xixón-Avilés

No que fai a l'AS-19 (Xixón-Avilés), el Principáu yá actuó nel 2015 nel tramu que va ente la glorieta de Tabaza y Avilés, lo que contribuyó a que nun se rexistraren accidentes graves nin l'añu pasáu nin lo que va d'éste. Primeramente, tamién s'intervieno na baxada hasta la glorieta de Tabaza, onde s'habilitó un carril lentu pa vehículos pesaos y llendóse a 70 quilómetros per hora la velocidá aconseyable.

D’equí a poco, la Direición Xeneral d'Infraestructures y Tresportes va actuar tamién nel tramu que percuerre los quilómetros 3,9 a 6,1 de la vía, con un proyeutu pa tresformar nuna glorieta la interseición actual del polígonu de Falmuria, colo que van evistase accidentes por algame. Amás, va rebaxase la velocidá en tol tramu.

Ye menester recordar que nesta vía esiste un cuartu y últimu tramu, ente l'enllaz de Llorea y L'Empalme (A-8), que foi tresferíu al Ministeriu de Fomentu y ye competencia, por tanto, de l'Alministración del Estáu.