Infraestructures destina un millón a la seguridá de los principales túneles de la rede nacional

La Conseyería d'Infraestructures, Ordenación del Territoriu y Mediu Ambiente destina 1,1 millones d'euros a ampliar el contratu que garantiza la seguridá nos principales túneles de la rede de carreteres de titularidá asturiana. Éstos son los d’El Rañadoiru, La Monxina, Riañu (Cadaval), La Zorera y San Tiso.

Belén Fernández  y el direutor xeneral d'Infraestructures y Tresportes, José María Pertierra, visitaron ayeri’l Centru de Control de Riañu, puestu en serviciu tres la finalización de les obres de duplicación de calzada de la carretera Avilés-El Puertu Tarna, y dende’l que se controla'l pasu de 25 millones de vehículos al añu. El centru dexa visualizar les imáxenes captaes poles cámares de Riañu (Cadaval), del Hospital Central (HUCA), El Rañadoiru, y de los accesos al túnel de La Zorera, mesmo que xestionar posibles incidencies per aciu un programa informáticu. Nos túneles de Riañu, HUCA y El Rañadoiru tamién s'instaló un sistema de detección automática d'incidentes.

La conseyera esplicó qu'énte l'aumentu de túneles con control automatizáu, el Gobiernu consideró necesario centralizar la supervisión y el control nun llugar únicu. Esi oxetivu supunxo un retu, yá que se trataba de distintos sistemes con equipos distintos.

Tres la so entrada en funcionamientu n'agostu del 2014, foron incorporándose otres instalaciones: de primeres, nel 2015, les asociaes al túnel d’El Rañadoiru na AS-15, Curniana-El Puertu Zarréu y los accesos al HUCA na OV-7; y, yá nel 2016, les de los túneles de San Tiso y La Zorera na Autovía Minera (AS-I), que xune Mieres y Xixón.

Incorporación progresiva d'otros túneles

Fernández anunció que la previsión ye dir incorporando otros 17 túneles de los 72 colos que cunta la rede asturiana, que sumen un llargor de 5.460 metros, colo que quedaría garantizáu'l control de los más singulares por carauterístiques xeométriques y tráficu. En concreto, asumiríase'l caltenimientu y la esplotación del restu de los túneles de l'autovía minera AS-I (ocho, que sumen 1.242 metros); el de l'AS-114, na variante de Cangues d'Onís; los de Fastia y Devoyu, na AS-117, Riañu-El Puertu Tarna; los cuatro de l'AS-118, Lluanco y Veriña y los d'El Corvero y La Cruz, na 'Y' de Bimenes. Una vegada remataren estes incorporaciones, el centru pasaría a controlar 67 millones de vehículos cada añu.

L'equipu necesariu pa garantizar la esplotación y el caltenimientu d’estos túneles ta constituyíu por un responsable y cinco operadores de consola cola función de garantizar el serviciu de vixilancia mientres les 24 hores del día, amás de personal pa realizar llabores de prevención y vixilancia de les instalaciones.

Na semeya, Pertierra y Fernández atienden a les esplicaciones d'un operador del Centru de Control de Riaño.