Industria caltién la so disposición al diálogu pa solucionar el conflictu n'ITVASA

La plantía refugó la propuesta de la conseyería de trabayar los sábados.

La Conseyería d'Industria, Emplegu y Promoción Económica busca dar salida a esta situación con una ampliación del horariu habitual d'apertura de la ITV, énte les llimitaciones pa la contratación de personal derivaes de los cambios llexislativos que s'adoptaron a nivel nacional nel 2012. La solución que plantega l'Alministración pasa por ufiertar serviciu dos hores más, de llunes a vienres, y abrir tamién los sábados, nesti casu, de 7 a 14 hores.

El día 7 representantes de la plantiya d’ITVASA y la mesma empresa roblaron un documentu nel Serviciu Asturianu de Solución d'Estraxudicial de Conflictos (SASEC) pol que se suspendía la xornada de trabayu afitada pa esi día y tamién la convocatoria de fuelga. Les partes alcordaron entós siguir coles negociaciones.

Dende'l Gobiernu apunten que trés de los cuatro sindicatos firmantes, CC OO, CSIF y CSI, incumplieron el prealcuerdu y caltuvieron el paru previstu, magar que yá taben convocaos pa retomar los contautos nel SASEC. Tres esta decisión, la conseyería plantegó ayeri una propuesta nueva que cubre tolos pidimientos sindicales.

Éstos son los siguientes:

• Abonu como hores estraordinaries el turnu de los sábados. Estes hores, amás, fáense de manera voluntaria per parte de la plantía, hasta'l máximu de 80 añales que permite la llexislación.  
• Retribución, como hores estraordinaries, de l'ampliación del horariu de llunes a vienres, teniendo en cuenta que la normativa vixente nun permite más de 80 hores estres al añu.
• Analizar la viabilidá de retomar l'atención ensin cita previa, dando siempre prioridá a la seguridá de les persones. 
• Incorporación de personal nes llendes que permite la lexislación estatal aplicable.

Negativa de los trabayadores

Énte esta proposición de l'Alministración, los sindicatos manifestaron la so negativa a trabayar los sábados tres consultar a los emplegaos, magar que l'asistencia sería siempre una decisión voluntaria. Sicasí, el Gobiernu diz caltener l'enfotu de buscar alternatives que permitan resolver el conflictu, anteponiendo siempre a cualesquier otru oxetivu la seguridá de la plantía y el derechu de la ciudanía a recibir un serviciu de calidá.