Indignaos de toda Europa van a salir a la cai’l domingu

|

Esti domingu tán convocaes manifestaciones en toda Europa pa siguir mostrando la indignación del pueblu col llabor de la clase política y la banca. N’Asturies, la protesta va celebrase en Xixón con salida de L'Humedal a les 18 hores.
 
‘Europa pa los ciudadanos y non pa los mercaos’ ye’l lema de la convocatoria pacífica prevista pa esti domingu pol movimientu ‘Democracia real yá’ en poblaciones del tol Estáu español a la que van sumase 58 ciudaes europees pa glayar ‘Non al Pautu del Euro’. “Esa midida, que va ser ratificada polos mandatarios europeos el 27 de xunu próximu, va ser el mayor atentáu socioeconómicu contra los derechos sociales, y la so aplicación tendrá repercusiones internacionales”, asegura nun comunicáu la plataforma convocante, qu’anuncia que, por esi motivu, tamién va haber concentraciones de protesta en Buenos Aires, New York y Tokio.
 
La convocatoria asturiana va celebrase a les 18 hores en Xixón y va consistir nun trayeutu ente L’Humedal y la Plaza Mayor. Dende ‘Democracia real yá’ conviden a los vecinos de Xixón que saquen a les ventanes mensaxes espresando la so indignación.
 
Na semeya: cartelu fechu pol coleutivu Anonymous AST pa ‘Democracia real yá’.

Contador Estadistiques