Indignaos asturianos participaron na manifestación celebrada’l domingu peles cais de Madrid

Les banderes d’Asturies dexáronse ver esti domingu en Madrid nuna manifestación d’indignaos que percorrió les cais de la ciudá. Mediu centenar d’asturianos aportaron el sábadu a la capital castellana tres una marcha de protesta de 23 díes.
 
Los asturianos entraron na Comunidad de Madrid el xueves pel túnel del Guadarrama –de peaxe–, bloqueando’l tráficu xunto colos compañeros gallegos, lleoneses y castellanos, tres cruciar la Meseta y llevar el so mensaxe a les places de los puelos qu’atoparon pel camín. La llegada a Moncloa foi de sábadu, puntu dende’l que se deplazaron a Sol, epicentru del movimientu 15-M madrilanu que, otra vuelta, enllenóse de xente reivindicando un sistema más igualitariu. Nesta xornada y na mañana del domingu, la plaza acoyó delles asamblees na que participó la xente de tolos puntos del Estáu que caleyaron la distancia esistente ente los sos llugares d’orixe y Madrid.
 
Pal domingu, pela tarde, taba prevista la manifestación –baxo’l lema ‘No es la crisis, es el sistema’– de les seis marches que s’entamaron con destín a Madrid. Ésta tornó a ser masiva, con decenes de miles de persones tomando otra vuelta les cais de la ciudá, y nella dexáronse ver una gran cantidá de banderes d’Asturies. A los indignaos asturianos que fixeron la marcha, cerca de mediu centenar, sumáronse persones desplazaes en autocar y coches particulares, amás de dalgunos de los munchos miembros de la colonia asturiana na capital castellana. La protesta terminó, como nun podía ser d’otra forma, na Puerta’l Sol, onde se desplegó la pancarta ‘Sin el pueblo no sois nada’.