Inda queden nueches folk

Anque'l veranu yá acabó y hai menos actuaciones, esti fin de selmana tovía podemos dir a una nueche folk o ver a ún de los meyores guitarristes de folk d'Escocia.

La nueche folk más inmediata ye mañana vienres nel conceyu de El Franco, concretamente n'A Caridá. Esta ye la segunda edición de la Nueche Folk, organizada pola asociación "Arcángel San Miguel" y nella van tocar los grupos "Llangres", de Llangréu, "O Son das Ondas" de Vigo, y "Cádaba" d'A Caridá.

P'aquellos que-yos quedé meyor el centru d'Asturies, puen ver tamién mañana vienres al guitarrista Tony Mcmanus acompañáu pol bretón Alain Genty col so baxu de seis cuerdes . Esti guitarrista escocés ye un nome perconocíu nel mundu del folk. La so calidá y esperiencia punxéronlu a trabayar con figures bien famoses como Phil Cunningham, Kate Rusby, Allison Brown, Liz Doherty o Colin Reid, ente una llarga riestra de collaboraciones. Mc Manus tamién desenvuelve una carrera en solitario con cuatro discos hasta esti momentu, anque con too y con ello tamién-y queda tiempu pa facer de productor, como nel casu del últimu discu del gaiteru escocés Gordon Duncan "Thunderstruck". Aficionáu a les músiques d'otros llugares, en 1998 l'escocés atrevióse col discu "Pourquoi Quebec" a averase a la música del país franco-canadiense, meciéndola dacuando con rexistros de jazz

L'actuación de McManus y Genty va ser nel "Palacio Revillagigedo" de Xixón esti vienres a les 22:30, dientro del ciclu de conciertos "Les Nueches del Palaciu". Pues consultar los datos d'esta y de más actividaes na guía d'ociu d'Asturiactiva