Inauguróse en Madrid la Selmana d'Alimentos de Calidá Diferenciada del Principáu d'Asturies

Dende'l llunes y hasta esti sábadu’l Mercado de La Paz, en Madrid, acueye la Selmana d'Alimentos de Calidá Diferenciada del Principáu d'Asturies. Un stand va informar y aconseyar a los consumidores y distribuidores de la capital castellana sobre los nuesos productos.

La conseyera de Desarrollu Rural y Recursos Naturales, María Jesús Álvarez González, acudió a la inauguración, na qu’animó a los madrilanos y madrilanes a averase al Mercado de La Paz pa “tastiar y mercar” alimentos asturianos de calidá diferenciada “porque son productos únicos, seguros y estraordinariamente sabrosos”. Según apuntó, esti mercáu ye ún de los meyores de Madrid, polo que se lu consideró afayadizu pa “poner en contautu directu al productor col consumidor, y tamién col distribuidor”.

“Aspiramos a que los nuestros productores faigan negociu nesta zona, qu'esta selmana va convertise nun centru d'asturianía” sorrayó. Al actu d'inauguración asistieron los responsables de los conseyos reguladores de les marques de calidá diferenciada d’Asturies, amás de representantes del Ministeriu d'Agricultura y Pesca, Alimentación y Mediu Ambiente.

Mientres la presentación de la Selmana, los asistentes tomaron sidra asturiana DOP, asina como la fabada de Casa Chema, distinguida como la meyor del mundu, y Quesu Casín. Nel stand instaláu tamién va haber prebes de comida y bébora mientres estos díes.

Diez marques de calidá

Asturies dispón de diez productos acoyíos a marques de calidá diferenciada con respaldu de la Xunión Europea: ‘Ternera Asturiana’, ‘Sidra de Asturias’, ‘Chosco de Tineo’, Faba Asturiana, ‘Vino de Cangas’, y cinco quesos (Cabrales, Gamonéu, Afuega´l Pitu, Casín y Beyos), xunto con un apartáu específico de productos de agricultura ecológica.

Asina mesmo, el Gobiernu del Principáu ye'l titular de la marca de garantía territorial ‘Alimentos del Paraíso Natural’, na que s'integren productos merecedores d'esta considerancia pol so orixe, el so procesu d'ellaboración tradicional y la so calidá reconocida.

Na semeya, el direutor xeneral de Desarrollu Rural y Agroalimentación, Jesús Casas; Álvarez González; y Joaquina Rodríguez, de Casa Chema.