Inaugúrase en Sotrondio la esposición 'Doce meses con causa'

Va tar abierta al públicu hasta'l llunes 10 d'ochobre na Casa de la Mocedá.

L'apertura de puertes d'esta amuesa del Instituto de Estudios para la Paz y la Cooperación (IEPC), financiada pola Axencia Asturiana de Cooperación al Desarrollu, Conceyu d'Uviéu y el Conceyu de Xixón, va ser a les 18 hores. El visitante va atopar un panel central nel que se presenta'l qué, el porqué y el para qué de la esposición y 15 paneles complementarios nos que se muestren los días internacionales o mundiales destacaos pol IEPC, acompañaos d'una frase célebre que lleva al llector a la reflexón y l'análisis críticu de les causes qu'orixinen diches conmemoraciones, ente les que s'echa en falta'l Dia Internacional de la Llingua Materna (21 de febreru).

L'oxetivu de 'Doce meses con causa' ye "sensibilizar y promover la reflexón de la opinión pública asturiana, en concreto los mozos y moces universitarios, acerca de temes políticos, sociales, culturales, humanitarios o rellacionaos col derechu del ser humano que nos corrrespuenden como ciudadanos y ciudadanes del mundu, despertando l'interés de la población asturiana sobre la importancia del apoyu y la movilización social en pro d'un mundu más xustu".